Жаңаесілдің жетістігі жоғары

Жаңаесіл станциясы – Қазақстан теміржолындағы стратегиялық маңызы бар ірі торап. Техникалық классификацияға сәйкес мәртебесі мен сипаттамасы бойынша кластан тыс тораптық станция саналады.

Станция маңызды 3 бағытта жұмыс атқарады: Жаңаесіл – Көкшетау, Жаңаесіл – Қостанай, Жаңаесіл – Пресногорьковская магистральдары. Былтыр жүк тасымалын жүзеге асыру бойынша станция жоғары нәтижеге қол жеткізді.  

– Станция жұмыс көлемі жағынан өте ауқымды, себебі мұнда сұрыптау дөңесінде пойыздарды құрастыру және ажырату бойынша үлкен маневрлік жұмыстар жүргізіледі. Сонымен қатар Жаңаесіл арқылы Қазақстанның орталық және солтүстік өңірлерінен Ресей мен Еуропа бағытына қарай негізгі жүк ағындары, яғни көмір, астық, кен тасымалы өтеді. Станцияда ірі локомотив депосы және вагондарға техникалық қызмет көрсету пункттері орналасқан. Инфрақұрылымы дамыған, «кластан тыс» мәртебесіне лайық тораптық станция, – дейді Жаңаесіл станциясының бастығы Ерлан Рахымжанов.  

Жалпы, Жаңаесіл станциясында 600-ге жуық теміржол қызметкерлері жұмыс атқарады, олардың қатарында ДС, ПЧ, ШЧ, ЭЧ, ТЧ, ВЧД, Қалпына келтіру пойызы, Жолаушылар тасымалымен айналысатын вокзал қызметі бар. Станциядағы 20 жолдың алтауы бас жол, ал сұрыптау паркінде 14 жол бар.  

– Былтыр жүк тасымалын жоспардан тыс жоғары деңгейде орындадық, іс жүзінде барлығы 213 402 вагон жүк тиелді, бұл дегеніңіз 2 млн тоннадан астам жүк. 2024 жылмен салыстырғанда 159 121 вагон артық жүк тиелген. Пайызбен салыстырғанда өсім 124,4 пайызды құрап отыр. 2025 жылы 78 вагон металлом, 16 454 вагон бидай, 12 459 контейнер, 12 вагон ұнтақталған ұн өнімдері тиелді, басқа да тиелген өнімдер 2361 вагон болды. Жүк түсіру бойынша 1466 вагон көмір, 618 вагон жанар-жағар май, 4919 вагон бидай, 22 вагон дәнді-дақылдар, 548 вагон тыңайтқыш және басқа да 13 658 вагон жүк түсірілді, – дейді станция бастығы.