Сағыз станциясында жүк айналымы өсіп, қауіпсіздік нығайды

Үлкен магистральдың бойында үлкенді-кішілі жүздеген станциялар мен разъездердің әрқайсысының өзіне тиесілі қызметі, атқаратын функциясы бар. Солардың бірі – Атыраудың Қызылқоға ауданына қарасты Сағыз станциясы.

Ауданға келетін жүктің 80 пайызы темір жол арқылы Сағыз бекетінен тасымалданады. Бүгінгі күнде станцияның теміржол аймағында әр құрылымнан құралған 250-ден аса жұмысшылар еңбек етеді. Олардың дені – жергілікті тұрғындар. Соңғы жылдары жол бойындағы алыс нүктелерге модульді үйлердің орнатылуы да жұмысшылар үшін қолайлы болды. Жолшы, вагоншы, байланысшылар мен энергетиктер бұрынғыдай вахталық әдіспен алыстан қатынамай-ақ, сол үйлердің игілігін көруде. Сонымен қатар Атырау жол дистанциясының өз күшімен станцияда табельдік ғимараты салынып, жергілікті жолшылардың да жаны кіріп қалған жайы бар.  

– Станция мен кірме жолдарда қауіпсіздік қозғалысын бұзу жағдайы, вагондардың бүлінуі сынды жағдайлар былтыр, биыл болған жоқ. Қазіргі уақытта тәулігіне орташа есеппен 26 жұп жүк пойызы өтіп, жүк айналым көлемі жылдан жылға артып келеді, орташа тәуліктік 20-30 пойыз, 175 вагон қабылдануда. 2025 жылдың 12 айында Сағыз станциясы бойынша 9408 пойыз, 556 312 вагон, ал желтоқсан айында 838 жүк пойызы қабылданып, оның құрамында 49 510 вагон болды, ол тәулігіне 1597 вагон. Жүк түсіру жоспары бойынша 4476 вагон түсірілді – 16 жабық, 4002 жартылай вагон, 37 платформа, 421 басқа да вагондар. Жөнелтілген пойыз саны – 9340, вагон – 555 589. Оның ішінде «Нұрлы жол» бағдарламасы бойынша вагондар да бар. Ол бағдарламаға сәйкес ауданда қазір автожолдар салу қарқынды жүріп жатыр. Соның ішінде Сағыз – Миялы тас жолы қайта салынуда. Оған қажетті қиыршық тас, топырақ, цемент, басқа да құрылыс материалдары станцияда түсіріліп, тасымалдануда, – дейді станция бастығы Серік Сұлтанов.  

Ал станцияда 8 негізгі жол, 4 тұйық бар, жолдың бәрінде жарық жеткілікті. 8 мыңдай халық тұрып жатқан Сағызда жаңа вокзал ғимараты салынып жатыр, құрылысы аяқталуға жақын.