Жіңішкенің жүктемесі жоғары

Жіңішке станциясы – Ақтөбедегі жүктемесі ең жоғары станция. Еуразияның маңызды көлік дәліздері тоғысқан логистикалық нысан десек болады. Мұны станцияның ай сайын белгіленген жоспарды межеге жеткізіп не асыра орындалуынан да көреміз.

Станциядағы жүк тасымалының негізгі үлесін мұнай, қара металл, құрылыс жүктері мен контейнерлік жүктер құрайды. Биыл қаңтар айында ең жоғары көлем қара металлға – 44 485 тонна, контейнерлік жүктерге 23 312 тонна тиесілі. Сонымен қатар химикаттар, құрылыс жүктері, түсті руда және жмық тасымалы да жүзеге асырылды.  Нәтижесінде тек қаңтар айында Жіңішке станциясында 112 мың тонна жүк тиелді. Тәуліктік орташа жүк тиеу көлемі 3642 тоннаны құрап отыр.

Жіңішке станциясының бастығы Талғат Сағыновтың айтуынша, жыл осындай жақсы көрсеткішпен басталды. Жүктелген міндеттеме де, атқарылған жұмыс та көңілден шығады. Шет елдерге жөнелтілетін жүк құрамдарымен жұмыс істейтін станцияда қозғалыс қауіпсіздігін қамтамасыз ету бағытындағы жұмыстар тұрақты жүргізіледі. Қызметкерлерге техникалық сабақтар арнайы кестеге сай ұйымдастырылып, тұрақты өткізіледі.    

– Соңғы уақытта темір жолды белгіленбеген жерден кесіп өту салдарынан жарақат алу мен қайғылы жағдайлар жиілеп тұр. Осыған байланысты теміржол инфрақұрылымындағы қауіпті жағдайлардың алдын алу шаралары күшейтілген. Тоқсан сайын көлік полициясы мен жергілікті атқарушы органдардың қатысуымен қауіпсіздік кеңесі өткізіліп, проблемалық мәселелер талқылануда. Бұдан бөлек, рейдтік шаралар да күшейтіліп, теміржол бойында бірлескен тексерістер жүргізілуде. Жергілікті тұрғындармен түсіндіру жұмыстары жанданды. Теміржол бойындағы қауіпсіздік ережелері жайлы арнайы бейнероликтер көрсетілуде. Бұл жұмыстарға теміржол мекемелері мен диспетчерлік қызметтер жауапты, – дейді станция бастығы.  

Жүктемесі ғана емес, жауапкершілік жүгі де жоғары Жіңішке станциясының Ақтөбе бөлімшесіндегі ролі ерекше, жалпы жүк тасымалына қосатын үлесі де қомақты.