Қаратау станциясында жұмыс қызып тұр
Жамбыл жүк тасымалы бөлімшесіне қарасты Қаратау станциясы өңірдегі тау-кен өнімдерін өндіретін компаниялармен тығыз жұмыс жасайды. Өнімдері өз елімізде де, шет елдерге де жөнелтілетін, үлкен сұранысқа ие болғандықтан пандемиялық карантин режиміне қарамастан, станция жұмыс қарқынын жоғалтқан жоқ. «Қазфосфат» ЖШС-ның Қаратау тау-кен өңдеу кешені әдеттегідей фосфор рудасын артуда. Сондай-ақ құрғақ құрылыс қоспаларын өндіретін «Қаратау ПРО Алинекс» кәсіпорнының да жүк айналымы төмендеген емес. Цельник өндіретін Қазақстандағы бірден-бір компания – «Талас Инвесттің» шаруасы да бүгінде жақсы жүріп жатыр, олар күніне бірнеше вагон жүк айналымын жасайды. «Жамбыл Недр» зауытының цементі де жүк тасымалын арттыруға өз үлесін қосып отыр екен. 1968 жылы ірге қалаған станцияда 23 теміржолшы еңбек етіп, қозғалыс қауіпсіздігін толық қамтамасыз етіп отыр. Станция директоры Нұржан Жақыпов қауіпті індетке қарамай, күнделікті шаруаның қарқынын бәсеңдетпе- гендеріне риза. Әсіресе, жоғарыдағы ірі төрт компаниямен тығыз қарым-қатынаста келісе де кеңесе отырып жұмыс жасап отырғандарының арқасында жоспарлы көрсеткіштер орындалып отырғанын жеткізді. Станцияның ешқандай қызметкері коронавирус індетіне шалдықпағанына қуанады. Десе де, «сақтықта қорлық жоқ» деген ұстаныммен станция қызметкерлері вакцина алып жатыр екен. «Өзім бірінші болып «QazVac» екпесін қабылдадым. Артымша он-шақты теміржолшы өздері қалаған вакциналарын алды. Олардың ішінде Ресейдің «Спутник В», араб-қытай бірлесе өндірген «Hayat Vac» вакциналары бар», – де- ген станция басшысының айтуынша, Қаратау станциясына вакцинаның 60 дозасы бөлінген. Теміржолшылар таңдауына қарай індетке қарсы екпенің кез келген түрін қабылдай алады.