Елде теміржол техникасын өндіру көлемі еселеп артты
Кеше, 19 тамызда Үкімет отырысында теміржол саласын дамыту мәселелері талқыланды. Жиында өнеркәсіп және құрылыс министрі Ерсайын Нағаспаев теміржол машина жасау саласындағы жетістіктер мен алдағы жоспарларды баяндады, деп хабарлайды Rail-news.kz.
Министрдің айтуынша, теміржол өнеркәсібі еліміздегі машина жасау өндірісінің 13 пайызын құрайды. Қазіргі таңда бұл салада 60-тан астам кәсіпорын жұмыс істейді, онда 8 мыңға жуық адам еңбек етеді. Өткен жылы теміржол өнімдерін шығару көлемі 25 пайызға өсіп, 600 миллиард теңгеге жеткен. Биылғы жеті айдың ішінде ашық жүк вагондарының өндірісі бес есеге, ал жайдақ платформалар 2,2 есеге артқан.
Соңғы бес жылда ұлттық оператордың вагон паркін жаңарту аясында салаға ірі инвестициялар тартылып, Қазақстан нарығына Wabtec, Alstom, Stadler сынды әлемдік жетекші компаниялар келді. Бүгінгі күні теміржол техникасы өндірісінде локализация деңгейі 35–40 пайыз аралығында қамтамасыз етіліп отыр. Бұл көрсеткішті одан әрі арттыру мақсатында отандық өндірушілердің қатысуымен жаңа кәсіпорындар ашылып, бірлескен жобалар жүзеге асырылмақ.
Жаңа өндіріс ошақтары
Елімізде соңғы жылдары теміржол техникасын өндіру бағытында бірнеше ірі зауыт іске қосылды.
Астана қаласында биыл қаңтар айында жылына жүзге жуық жолаушылар вагонын шығаратын «Stadler Қазақстан» зауыты пайдалануға берілді. Шығарылған вагондар 2030 жылға дейін «Қазақстан темір жолы» компаниясына жеткізілмек. Жыл соңына дейін алғашқы 51 вагон пайдалануға берілмек.
Атырау облысында жылына 6 мың жүк вагоны мен цистерна өндіретін зауыт іске қосылды. Сондай-ақ инвестор жылына 60 мың тоннаға дейін бөлшектер құятын Foundry кластерін салуда. Бұл кешеннің ашылуы 2027 жылға жоспарланған.
Семей қаласында жылына 600 жүк вагонын шығаратын жаңа өндіріс орны жұмысын бастады.
Екібастұз қаласында теміржол техникасы мен оның құрамдас бөлшектерін өндіретін ірі кластер құрылды. Биыл осы жерде жылына 160 мыңға дейін өнім шығаратын бандаждық кешен іске қосылады.
Ішкі нарықты дамытуға серпін
Ерсайын Нағаспаевтың айтуынша, оффтейк-келісімшарттар отандық өндірушілерді тұрақты тапсырыс көлемімен қамтамасыз етіп, өндірістік қуаттың тиімді пайдаланылуына жағдай жасайды. Сонымен қатар вагон шығаратын зауыттарда жергілікті материалдар мен бөлшектердің үлесі арттырылмақ.
Қазіргі таңда министрлік барлық вагондар мен локомотивтерге қажетті бөлшектерді жинақтап, дайын өнім шығару жөніндегі кешенді келісім жобасын әзірлеуде. Бұл бастама импортқа тәуелділікті азайтып, отандық машина жасау саласын жаңа деңгейге көтереді.
Өнеркәсіп және құрылыс министрлігі теміржол машина жасау саласын дамыту арқылы экономиканың тұрақты өсуіне ықпал етуді көздеп отыр. Жаңа өндірістердің іске қосылуы, шетелдік инвесторлардың келуі және отандық кәсіпорындардың белсенділігі – бұл саланың болашағы зор екенін көрсетеді.