Кәсіподақ басшылығы диагностика орталығы жұмысымен танысты

Биылғы «Жұмысшы мамандықтар жылына» орай ҚР Кәсіподақтар Федерациясының басшылығы «ҚТЖ» ҰК» АҚ «Жол диагностикалау орталығы» филиалы ұжымымен кездесті. Жиын мақсаты – өндірісте еңбек қорғауды, пойыздар қозғалысын қамтамасыз ету, еңбек ұжымының әлеуметтік мәселелерін талқылау, еңбек қатынасындағы өзекті мәселелер мен кәсіподақтың рөлі туралы пікір алмасу.

Соңғы жылдары Жол диагностикалау орталығына заманауи технологиялар кеңінен енгізіліп, соның нәтижесінде қызметкерлердің еңбек жағдайын жасауда бірқатар өзгерістер орын алуда. ҚР Кәсіподақтар федерациясының төрағасы Сатыбалды Дәулеталин бастаған топ сол өзгерістермен танысу үшін орталық ғимаратын аралап, мобильді диагностикалау кешендерінің жұмысын қарап көрді.  

– Біз теміржолдың үш бағыты бойынша диагностика жасаймыз. Ұлттық компанияның ең басты құндылығы – адами ресурс. Олардың қауіпсіздігі бәрінен маңызды, сондықтан жылдан жылға оларды ақаутапқыш арбаларынан мобильді кешендерге көшіріп жатырмыз. Соңғы 10 жылда бізде цифрландыру бойынша ауқымды жобалар жүзеге асырылып келеді. Теміржолды диагностикалау үшін 594-тен астам бақылау құралдары пайдаланылуда. Орталық компанияның құрылымдық бөлімшелерімен жол шаруашылығы объектілерінің элементтерін сынау, диагностикада жаңа техника енгізу кезінде өзара бірлесе жұмыс істейді. Сондай-ақ диагностикалау нәтижелері туралы талдамалық, анықтамалық материалдар дайындайды және сондай құралдар арқылы алынған деректер негізінде пойыздардың қозғалыс жылдамдығын арттыру немесе төмендету туралы ұсыныстар береді. Осы жұмыстарды штаттағы 1000-нан астам адам атқарады, – дейді аталған орталықтың директоры Аслан Ақашев.  

Қырқыншы станциясында орналасқан орталықтың бас ғимараты 1979 жылы салынған, оны ұжым өз күшімен заманауи талаптарға сай жөндеп алған. Сонымен қатар мекеме аумағында өздері салған үш темір жолда баланстағы диагностикалық кешендер кезегімен келіп тұрады, жабдықталып, қандай ауа-райына қарамастан алыс жұмыс сапарларына аттанады.  

Ай сайын орталықтың осындай кешендері 21 мың км теміржолды диагностикадан өткізеді. Он бес күндік вахталық тәсілмен арнайы жабдықталған мобильді диагностикалық зертханалары (МДЗ) бар вагондар Қазақстан бойынша теміржолдарды тексеріп, ақаулықтарын анықтап қайтады. Кездесу кезінде сол мобильді диагностикалық зертханалардың, мобильді диагностикалық кешендердің, ақаутапқыш, жол өлшегіш вагондардың жұмысы көрсетілді. 2023 жылы әкелінген шағын МДЗ-лардың жұмысы үлкен техника көре алмайтын жерлердегі ақауды табуға бағытталса, 2016 жылы алғаш пайдалануға берілген МДК вагондары жан-жақты бейнебақылау арқылы рельстердің қисық, түзулігін, ауытқуын анықтайды. Осындай кешендердің әрбірінің өз басшысы мен ауысымдық қызметкерлері бар. Кәсіподақ өкілдері бас ғимарат ішінде ақауларды расшифровкалау және бүкіл тексеруден кейінгі ақпараттар түсетін кабинеттерді аралады, ондағы теміржолшылардың әлеуметтік жағдайын және жалақысы туралы сұрады. Жиын соңында федерация басшысы орталық жұмысы мен ондағы теміржолшыларға жасалған еңбек жағдайына оң баға беріп, қызметкерлердің Ұжымдық шарттағы міндеттер мен жеңілдіктер туралы сұрақтарына жауап берді.