Локомотив құрастырудың қазақстандық үлгісі

Астанада өтіп жатқан ТЖЫҰ Бас директорлары конференциясының XL отырысы аясында шетелдік теміржол әкімшіліктерінің өкілдері Alstom (ЭҚЗ) және Wabtec (ЛҚЗ) зауыттарына барып, қазақстандық локомотив құрастыру үдерісімен танысты.

Alstom – Орталық Азия мен Кавказдағы электровоздардың жалғыз өндірушісі. Қазақстанда компания төрт қаладағы жеті өндірістік және сервистік алаңнан тұратын кешенді желіні басқарады. Бүгінгі таңда компания Қазақстан темір жолы және Әзербайжан темір жолдары үшін 450-ден астам электровоз өндірді. Бұл локомотивтер бүкіл өңірде табысты пайдаланылып, жергілікті өндірілген жылжымалы құрамның сенімділігі мен жоғары сапасын дәлелдеп келеді.  

Альстом мамандары ағымдағы инвестициялық бағдарлама аясында 2025 жылы Жамбыл облысының Шу қаласында жаңа сервистік депо ашылып, техникалық қызмет көрсету сапасы мен қолжетімділігі арттырылғанын атап өтті. Сонымен қатар Астана қаласында озық сигнализация технологиялары бойынша Құзыреттер орталығы іске қосылған, ол өз кезегінде цифрлық және сигнал беру шешімдерін жерсіндіруге ықпал етіп отыр екен.  

– Alstom мен Қазақстан арасындағы әріптестік индустрияландырудың, жаңа жұмыс орындарын құрудың, технология трансферінің және ұзақ мерзімді стратегиялық ынтымақтастықтың жарқын үлгісі болып табылады. Бұл өз кезегінде еліміздің Еуразиядағы көлік және инженерлік хаб ретіндегі мәртебесін нығайтады, – деді Альстом компаниясы басқарма төрағасының жылжымалы құрам бойынша орынбасары Лоран Базин.  

Бұдан кейін ТЖЫҰ Бас директорлары конференциясы отырысына қатысушылар Wabtec зауытындағы тепловоз құрастыратын өндіріс орындарын аралады.  

Соңғы 27 жылда Wabtec компаниясы Қазақстанда жасалған жаңа және жаңғыртылған 1000 тепловозға толыққанды қызмет көрсетіп келеді. Локомотив құрастыру зауыты қабырғасынан ҚТЖ компаниясы мен экспорттық нарықтарды қоса алғанда, Тәжікстан, Қырғызстан, Әзербайжан, Украина, Түркіменстан, Молдова, Моңғолия үшін 700 астам локомотив жасап шығарылған. Ауыр машиналарды шығару ісімен 700 адам айналысса, оның ішінде инженерлік құрамдағы 50 қызметкер Америкада оқытудан өткен.  

Wabtec мамандарының айтуынша, тепловоздарға пайдаланылатын бөлшек-тетіктердің 40 пайызы жерсіндірілген. Компания локомотив құрастыру зауытында Trip Optimizer және KINETIX сынды цифрлық шешімдерді енгізіп, жұмыс технологиясын жеңілдетуге атсалысып келеді.  

Зауыттың 8 сервистік орталығы және Қазақстанмен қатар ТМДның барлық аймағына қызмет көрсететін сертификатталған техникалық персоналдары бар. Зауыт GEVO12 дизельдік қозғалтқыштары мен локомотивтің басқа да компоненттеріне күрделі жөндеу жүргізеді. Сонымен қатар көршілес электровоз құрастыру зауыты үшін оларға қажетті бөлшектерді шығару ісімен айналысады.  

Мәртебелі меймандар зауыттың әр цехын аралап, өздерін қызықтырған сұрақтардың жауабын алды.