Еуропаның қай елінде халық пойызды көп қолданады?
Бүгін Еуропаның қай елінде темір жол желісі жақсы дамығанын және халық пойызды жиі қолданатын елдер жайлы айтатын боламыз.
Айта кету керек, соңғы кезде Еуропа елдері энергияны үнемдеп, қоршаған ортаны қорғау үшін халыққа жеке автокөлікті қолдануды азайтып, қоғамдық көлікпен жүруді кеңінен насихаттап жатыр. Бұл тұрғыда темір жол көліктерінің алар орны ерекше. Өйткені пойызбен жүру қауіпсіз әрі ыңғайлы.
Еуропадағы жолаушылар пойызының жүру жиілігі, сапасы өзге елдермен салыстырғанда жоғары екені белгілі. Ең жоғарғы көрсеткіштер Швейцария, Австрия, Франция және Швецияда тіркелген.
Еуропада кімдер көп пойызбен жүреді? Жолаушылар ағынындағы пойыздардың үлесі қай елдерде жоғары? Ең жоғары теміржол тығыздығы қай жерде?
Темір жол көлігінің дамуын бағалаудың әртүрлі көрсеткіші бар. Сондай тәсілдің бірі жолаушы-километр, бұл бір тұрғынға шаққандағы темір жолмен жүріп өткен орташа қашықтық.
Жалпы жолаушы айналымы республикалық және халықаралық жолаушылар айналымының қосындысына тең. Мұнда жолаушылардың азаматтығы ескерілмейді.
Халықаралық саяхат үшін жолаушы-километр деректері тек ұлттық желілерде жүріп өткен қашықтықты немесе басқаша айтқанда, белгілі бір ел ішінде орын алған сапардың сол бөлігін қамтиды.
Еуростаттың мәліметінше, халықаралық қозғалыс барлық теміржол пайдаланушылар арасындағы шетелдік туристердің маңыздылығын, яғни астана мен басқа қалалардың шекараға жақындығын, жоғары жылдамдықты теміржол қызметтеріне қол жетімділігін және негізгі халықаралық көлік дәліздерінің бойында орналасуын негізге алады.
Мәселен, бір тұрғынға шаққанда ең жоғары орташа халықаралық теміржолмен жүру қашықтығы Люксембургте (136 км), одан кейін Швейцарияда (65,2 км) тіркелген.
Чехияда (57,5 км), Францияда (48,6 км), Германияда (43,7 км), Данияда (36,8 км) және Австрияда (26 км) халықаралық жол жүру үшін жан басына шаққандағы орташа жолаушы километрі ЕО орташа көрсеткішінен (22,7 км) жоғары болды.
Бір тұрғынға шаққандағы пойыз сапарларының саны
Бір тұрғынға шаққандағы теміржол көлігімен сапарлар саны бойынша Швейцария көш бастап тұр – 60,8. Басқа елдердің ішінде бұл көрсеткіш Литвада 1,8-ден Люксембургте 40,8-ге дейін ауытқыған. ЕО орташа көрсеткіші 18,4 болды.
Жолаушылар ағынындағы темір жол көлігінің үлесі
Тағы бір маңызды көрсеткіш – ішкі жолаушылар тасымалының модальды бөлінісі.
Еуростаттың мәліметі бойынша, ішкі транспорт құрлықта жүзеге асырылатын тасымалдың барлық түрлерін қамтиды, тек әуе мен теңіз тасымалынан өзге. Ішкі тасымалдағы пойыздың үлесі Швейцарияда жоғары, ал ең төмені Солтүстік Македонияда тіркелген. Сонымен қатар, Германия мен Ұлыбританияда да халықтың көбі пойызбен жүруді құп көреді екен.
Еуропалық комиссия тұрғындарды жеке көлікпен қатынаудан бас тартып, қоғамдық көлікке көшуге үндеп отыр. Бұл энергия тұтынуды үнемдейді әрі қоршаған ортаны зиянды қалдықтардан қорғауға септігін тигізеді.