Siemens америкалық кәсіпорынға 500 млн доллар инвестиция құйды
Компанияның цифрландыру, электрлендіру және тұрақтылық саласындағы көшбасшылығын нығайтуға арналған 2 миллиард долларлық жаһандық инвестициялық стратегияның бөлігі ретінде Siemens 2023 жылы АҚШ-тағы операцияларына шамамен 510 миллион доллар бөлді, нәтижесінде 1700 жаңа жұмыс орыны пайда болмақ.
Компания АҚШ-тан басқа Қытай, Оңтүстік-Шығыс Азия және Еуропада жаңа кәсіпорындар құруға әрі жұмыс істеп тұрғандарын жаңғыртуға қаржы бөліп отыр.
Siemens 2023 жылы Лексингтонда (Солтүстік Каролина) жеңіл вагондар шығаруға, сондай-ақ локомотивтер мен жолаушылар вагондарына техникалық қызмет көрсету және жөндеуге бағытталған нысанның құрылысына 220 миллион доллар инвестиция салды.
Сондай-ақ компания Даллас/Форт-Уэрт (Техас) аймағындағы жаңа жоғары технологиялық өндіріске 150 миллион доллар инвестиция салып жатыр. Кәсіпорын АҚШ-тың деректер орталықтары мен басқа да маңызды инфрақұрылымдарын электрмен жабдықтау үшін заманауи, жоғары тиімді және сенімді электр жабдықтарын шығаратын болады.
Форт-Уэрттегі зауыт 2024 жылы іске қосылып, 2025 жылы толық қуатына шығады деп жоспарлануда.