Трансауған теміржол магистралі іске аса ма?

Өткен демалыс күндері Ыстамбұлда өткен Көлік байланысы жөніндегі жаһандық форумда Ресей көлік вице-министрі Дмитрий Зверев пен Өзбекстан өкілдері кездесіп, Трансауған теміржолын салу жобасын, ресейлік компаниялардың инфрақұрылымға қатысуы мен мультимодальды бағыттарды бірлесіп дамыту мәселелерін талқылады, деп хабарлайды Rail-news.kz.

Бұл жоба — Ресей мен Өзбекстан арасындағы соңғы жылдардағы ең ауқымды бірлескен бастама. Оны іске асыру туралы келісім 2025 жылдың 8 сәуірінде жасалды. Қазір ресейлік және өзбек ұйымдары технико-экономикалық негіздемені (ТЭО) әзірлеп жатыр.

Талқыланып жатқан екі бағыттың біріншісі — Термез – Наибабад – Логар – Харлачи, ол Өзбекстан мен Пәкістанды ең қысқа жолмен байланыстырады. Екінші бағыт — Мазари-Шариф – Герат – Диларам – Кандагар – Чаман, ұзағырақ, бірақ Ауғанстанның батыс аймақтарын қамтып, ел ішіндегі көлік желісін нығайтады.

Жобаның нақты параметрлері анықталмайынша, бұл маршруттардың артықшылықтары мен кемшіліктерін бағалау қиын. Бірақ «Узбекистон темир йуллари» компаниясының белсенді қатысатыны анық. Себебі Өзбекстан үшін бұл жоба аса маңызды — ел теңізге тікелей шыға алмайтындықтан, порттарға қолжетімділік іздеуде. Осы мақсатта Ирандағы Шахид Раджаи портында логистикалық орталық салу жоспарланып отыр. Сонымен қатар, Өзбекстан Пәкістанның Карачи мен Гвадар порттарына шығуды қалайды.

2024 жылдың тамызында Өзбекстан Ауғанстандағы Хайратон – Наибабад – Мазари-Шариф теміржол желісін қалпына келтіріп, іске қосты. Бұл жұмыс Трансауған магистралінің алғашқы қадамы ретінде бағалануда.