Қытай жүрдек пойыздар желісінің жылдамдығы мен ұзындығын арттыруда
Қытай теміржол саласындағы көшбасшылығын нығайта отырып, жоғары жылдамдықты теміржол (ЖЖТ) желісін кеңейтіп, 2035 жылға қарай пойыздардың қозғалыс жылдамдығын 400 км/сағ-қа дейін арттыруды жоспарлап отыр, деп хабарлайды Rail-news.kz.
Бұл туралы China Railway президенті Сидэ Сун Бейжіңде өткен ЖЖТ жөніндегі Дүниежүзілік конгресс барысында мәлімдеді.
2024 жылдың өзінде Қытайдағы ЖЖТ желісінің жалпы ұзындығы 48 000 шақырымға жетті, бұл – әлемдегі барлық жүрдек теміржолдардың 70 пайызына тең.
Жыл соңына дейін бұл көрсеткіш 50 000 шақырымға жетпек, ал 2035 жылға қарай тағы 40 пайызға ұлғаяды.
Жүрдек теміржол маршруттары халық саны 500 мыңнан асатын қалалардың 97 пайызын қамтиды.
Күніне 10 000-нан астам пойыз 16 миллион жолаушыны тасымалдайды.
Жылдамдықты арттыру мақсатында 2024 жылғы желтоқсанда CR450AF Fuxing атты жаңа прототип таныстырылды. Сынақ барысында бұл пойыз 420 км/сағ жылдамдыққа жетіп, қазіргі шектеуден 70 км/сағ-қа асып түсті.
CRRC компаниясы Қытайдың Теміржол ғылым академиясымен бірлесіп жұмыс істеп, қозғалысты басқару жүйесіне цифрлық технологияларды белсенді енгізуде.
Мұндай инновациялар сапар уақытын қысқартып, желідегі қауіпсіздікті арттыруға мүмкіндік береді.
Қытай халықаралық теміржол ықпалын да арттырып келеді
Қытай өз технологияларын шетелге экспорттап, Лаос, Индонезия, Венгрия және Сербиядағы жобаларға қатысып отыр.
Бұл бастамалар елдің теміржол көлігі саласындағы жаһандық көшбасшылық ұстанымын күшейтуде.
Конгресс ашылуында Моңғолия, Қырғызстан, Лаос және Өзбекстан делегациялары сөз сөйлеп, Қытаймен бірлесіп халықаралық жобаларды дамытуға дайын екендерін білдірді.
Қытай вице-премьері Гоцин Чжанның айтуынша, 2000-жылдардың басында ел шетелдік технологияларға тәуелді болған.
Ал бүгінде Қытай ЖЖТ-ға арналған негізгі компоненттерді өзі жасап шығара алады.
«Біз қазір тек әлемдік көшбасшыларға жетіп қана қойған жоқпыз, оларды басып озуға да дайынбыз», — деп атап өтті Чжан.
Бұл өршіл стратегия Қытайды технологиялық көшбасшылықтың жаңа деңгейіне шығаруда.