Үндістанда сутекті пойыз сынақтан сәтті өтті

Үндістанда сутекпен жүретін пойыз сәтті сынақтан өтті. Бұл оқиға экологиялық таза технологияларға көшу және тұрақты көлік жүйесін дамыту стратегиясының маңызды кезеңі болды, деп хабарлайды Rail-news.kz.

Ченнай қаласындағы ICF зауытында мамандар Indian Railways үшін құрастырылған сутекті пойызды сынақтан өткізді. Тексеру барысында тарту және қосалқы жүйелер, сондай-ақ басқару компоненттері сыналды.

Жобаны үнділік Medha Servo Drives компаниясы басқарды. Ол канадалық Ballard Power Systems компаниясымен әріптестік орнатып, қуаттылығы 100 кВт болатын сутекті отын элементтерін жеткізді.

10 вагоннан тұратын пойыз екі моторлы секциямен жабдықталады. Жалпы қуаты – 1200 ат күші, ал жолаушылар сыйымдылығы 2600 адамнан асады.

Сынақ нәтижелері пойыздың болашақ бағыттарға техникалық дайындығын растады. Әзірге пойыз жолаушылар тасымалын бастамағанымен, билік оны жүргізетін басым маршруттарды анықтап қойды.

Үндістанның көлік министрі Ашвини Вайшнавтың айтуынша, алғашқы сутекті пойыз 2027 жылы Харьяна штатындағы Сонипат – Джинд бағыты бойынша жүреді. Бұл бағыттың ұзындығы – 89 шақырым.

Үндістан 35 сутекті пойыз жасауға 340 миллион доллар, ал жанармай құю инфрақұрылымын дамытуға 73 миллион доллар бөлді. Бір пойыздың құны 9,2 миллион доллар, ал бір маршрутты жабдықтау 8 миллион долларға түседі.

2024 жылғы қазанда GreenH Electrolysis компаниясы протоналмасу мембранасы бар электролизерді таныстырды. Бұл құрылғы тәулігіне 430 кг сутек өндіре алады, ол пойыздарды үзіліссіз жанармаймен қамтамасыз етуге мүмкіндік береді.

Үндістан билігі сутекті тартқышты көлік жүйесін жаңғыртудың маңызды бағыты деп есептейді. Сол себепті инвестициялар жалғасып жатыр, алдағы жылдары ел сутекті көлік (H2-мобильділік) саласында көшбасшы болуға ниетті.