Мексикада жүк пойызы автобуспен соқтығысты: 10 адам қаза тауып, 60-тан астамы жараланды
Мексикада жүк пойызы екі қабатты автобуспен соқтығысып, кемінде 10 адам қаза тапты. Жергілікті биліктің хабарлауынша, 60-тан астам жолаушы жарақат алған, деп хабарлайды Rail-news.kz.
Оқиға 8 қыркүйекте ел астанасының солтүстік-батысындағы Атлакомулько қаласына жақын тас жолдың өнеркәсіптік аймағында болған.
Алғашында қайғылы оқиғаның мән-жайы белгісіз болды. Алайда әлеуметтік желілерде тараған бейнежазбада автобустың көліктердің қалың ағынында теміржолға шығып қалған сәті көрсетілген. Дәл сол мезетте қатты жылдамдықпен келген пойыз автобустың бүйірінен соғып, оны қақ бөліп жіберген.
Мехико штатының азаматтық қорғаныс агенттігінің дерегінше, құтқару қызметтері қазір де апат орнында жұмыс істеп жатыр. Штат прокуратурасы оқиғаның мән-жайын анықтау үшін тергеу бастаған. Белгілі болғандай, автобус «Эррадура-де-Плата» бағыты бойынша жолаушыларды тасымалдаған.
Бас прокуратура нақтылағандай, қаза тапқандардың арасында 7 әйел мен 3 ер адам бар. Жараланғандар медициналық мекемелерде көмек алды: олардың бір бөлігі үйлеріне шығарылды, алайда бірнеше адам ауыр халде жатыр.