Калифорнияда сутекпен жүретін алғашқы пойыз іске қосылды
АҚШ-тағы алғашқы сутекпен жүретін пойыз Оңтүстік Калифорниядағы Сан-Бернардино округінің Arrow қала маңы желісінде пайдалануға берілді, деп хабарлайды Rail-news.kz.
FLIRT H2 сериясына жататын бұл пойыз отын элементтері мен аккумуляторлық батарея жинағынан қуат алады. Оны Stadler компаниясы 2019 жылғы келісімшарт бойынша құрастырған. Пойыз 2022 жылы АҚШ-қа жеткізіліп, кейін Колорадо штатындағы Көлік технологиялары орталығының (TTC) сынақ полигонында және Сан-Бернардино көлік басқармасының (SBCTA) желісінде қарқынды сынақтан өткен.
Калифорнияда пойызға ZEMU (Zero Emission Multiple Unit – Нөлдік шығарындылы көпқұрамды пойыз) атауы берілді. Ол 2022 жылдың қазан айында ашылған ұзындығы 14,5 км болатын, бес станциясы бар Arrow желісі бойынша қатынайды. Бұл желі Сан-Бернардино қаласын Редландс қаласындағы университеттік кешенмен байланыстырады. Сан-Бернардино қаласының Даунтаун станциясынан пойыз алғашқы рет 13 қыркүйек күні сағат 10:23-те тұрақты рейске шықты. SBCTA дерегінше, алғашқы күні жолаушылар үшін тегін қызмет көрсетілген.
Алғашқы жоспар бойынша пойыз 2024 жылы тұрақты қатынасқа шығуы тиіс болған.