Зангезур дәлізі мен «Солтүстік – Оңтүстік» көлік дәлізі бір-біріне бәсекелес пе?

Зангезур дәлізі мен халықаралық «Солтүстік – Оңтүстік» көлік дәлізі бір-біріне бәсеке тудырмайды. Бұл туралы Ресей Қауіпсіздік кеңесінің хатшысы Сергей Шойгу ТМД елдері Қауіпсіздік кеңестері хатшыларының XIII кездесуінен кейін журналистерге мәлімдеді, деп хабарлайды Rail-news.kz.

– Екі бағыт та тек өмір сүруге ғана емес, нақты қажеттілікке ие. Олар Әзербайжанның өз аймақтарымен байланысын нығайтып, елдер арасындағы сауда қатынасына жол ашады, – деді Шойгу.

Оның айтуынша, «Солтүстік – Оңтүстік» дәлізі оңтүстіктегі порттарды Солтүстік мұзды мұхитпен және Солтүстік теңіз жолымен байланыстыратын маңызды бағыт болып саналады.

– Бұл жобада теріс ештеңе жоқ. Мұнда айналып өту немесе бір-бірін ығыстыру жайлы сөз болмайды. Ресей – кең аумақты және көлік инфрақұрылымы жақсы дамыған ел, ал жаңа жолдардың салынуы – әрдайым пайдалы, – деп атап өтті ол.