Грузияда Орта дәліздің артықшылықтары айтылды
Грузия парламентінің төрағасы Шалва Папуашвили Орта дәліздің іске асуы Оңтүстік Кавказдағы инвестиция көлемін арттырып, аймаққа жаңа мүмкіндіктер ашатынын мәлімдеді. Оның сөзінше, жоба Грузия үшін де, бүкіл өңір үшін де стратегиялық маңызға ие, деп хабарлайды Rail-news.kz.
Report агенттігінің хабарлауынша, Папуашвили Орта дәліздің ашылуы инфрақұрылымдық және экономикалық тұрғыда айтарлықтай артықшылық беретінін атап өтті.
«Бұл дәліз төңірегіндегі инфрақұрылымдық инвестицияларды да, жалпы өңірге тартылатын қаржыны да ұлғайтады. Біз бұл бастаманы толық қолдаймыз», — деді ол.
Грузия парламентінің басшысы бәсекенің күшеюі дәліздің тартымдылығын арттырып, өңірдегі тұрақтылықтың көрсеткіші болатынын қосты.
Ал ЕО–Грузия іскерлік кеңесі Орта дәлізді дамыту үшін бірыңғай бизнес-платформа құруды ұсынып отыр. АПА агенттігінің мәліметінше, бұл бастама 20 қарашада Тбилисиде өткен, сегіз ел делегациясы қатысқан Қаратеңіз платформасы конференциясында жарияланған.
Ұйымның бас хатшысы Звиад Чумбуридзенің айтуынша, платформа құру мәселесі бойынша екі жұмыс кездесуі өтеді.
«Бірінші кездесу келесі жылдың басында Батуми қаласында ұйымдастырылады. Одан кейін Қазақстанда кеңейтілген отырыс өткізу жоспарда бар. Онда Қаратеңіз платформасының барлық қатысушылары қатысып, секретариат құрылатын болады. Платформаның құрылтайшылары қатарында Қазақстан, Өзбекстан және Әзербайжан компаниялары да болуы мүмкін. Соңғы мақсат — бизнес үшін ортақ ашық алаң қалыптастыру», — деді ол.
Өңірдегі көлік дәліздеріне деген қызығушылық артқан сайын, Орта дәліздің геосаяси және экономикалық салмағы да күшейе түспек.