Қытай ЖТС бойынша жүкті экспресс-жеткізудің жаңа сервисін іске қосты
Қытайда 2025 жылғы 17 қарашада Ухань – Гуанчжоу бағыты бойынша шамамен 1000 км ұзындықтағы қолданыстағы жоғары жылдамдықты теміржол (ЖТС) желісімен шағын жүк жөнелтілімдерін жоғары жылдамдықты электр пойыздармен жеткізетін жаңа сервис пилоттық режимде іске қосылды, деп хабарлайды Rail-news.kz.
Бұл желі Қытайдың орталық және оңтүстік бөлігіндегі ірі экономикалық өңірлерді байланыстырады. Тасымалдау операторы – Қытай темір жолдарының еншілес кәсіпорны China Railway Express (CRE).
Жүктер таңсәріде, жолаушылар тасымалы басталғанға дейін, бортында жолаушыларсыз жүретін пойыздармен жеткізеді. Бұл пойыздар жолдың техникалық жағдайын динамикалық бақылау және оның қауіпсіздігін растау мақсатымен күн сайын желіге шығады. Екі пойыз шамамен таңғы сағат 5-те желінің соңғы станцияларынан жөнелтіліп, аралық станцияларға тоқтамай, 4,5 сағатта межелі жерге жетеді.
Пилоттық рейс кезінде шамамен 10 тонна болатын азық-түлік, фармацевтикалық өнімдер, электроника және бизнес-жөнелтілімдер салынған қаптар пойыздың жолаушылар вагондарындағы қаптамамен жабылған орындықтарға теңдей етіп орналастырылды. Жаңа бағыт бойынша аптасына төрт жұп пойыз жүк тасымалдайды деп жоспарланып отыр.
Бұл сервис Қытайдағы басқа да ЖТС бойымен ұйымдастырылған ұқсас қызметтерді толықтырады. Олардың қатарында Куньмин – Чэнду, Чжэнчжоу – Чунцин және Наньчан – Шэньчжэнь бағыттары бар.