Түркия 2026 жылы теміржол жобаларына 6 миллиард доллардан астам инвестиция салмақ

Түркия үкіметі 2026 жылға арналған инвестициялық бағдарлама аясында 91 теміржол жобасын іске асыруға 261,58 млрд түрік лирасын (шамамен 6,04 млрд АҚШ доллары) бөлді. Оның ішінде 54 жобаға Түркия мемлекеттік теміржолы (TCDD), 15 жобаға жолаушылар мен жүк тасымалының ұлттық операторы TCDD Taşımacılık, ал 22 жобаға Көлік және инфракұрылым министрлігі жауапты. Бұл жобалардың бір бөлігін 2026 жылы аяқтау көзделсе, қалғандары 2032 жылға дейін жалғасады, деп хабарлайды Rail-news.kz.

TCDD Taşımacılık операторына 38 млрд лира бөлінген. Бұл қаражаттың 24,27 млрд лирасы басталып кеткен жобаларға, ал 13,73 млрд лирасы жаңа бастамаларға бағытталады. Бағдарламада отандық өндірістегі тепловоздар мен электропойыздарды сатып алуға басымдық берілген. Оларды жеткізу жұмыстары 2028 жылға дейін толық аяқталады деп жоспарлануда.

Ал TCDD мекемесіне ірі инфрақұрылымдық жобалар үшін 111,58 млрд лира бөлінді. Бұл қаражат мынадай жоғары жылдамдықты желілердің құрылысын жалғастыруға жұмсалады:

Черкезкөй — Капикуле;

Адана — Османие — Газиантеп;

Сивас — Эрзинджан;

Конья — Караман — Нигде — Мерсин — Адана;

Анкара — Измир.

Көлік және инфракұрылым министрлігіне тиесілі 112 млрд лира 59 провинциядағы жаңа желілердің техникалық-экономикалық негіздемесін (ТЭН) дайындауға, сондай-ақ Гебзе — Хайдарпаша және Сиркеджи — Халкали бағытындағы қала маңы пойыздарының желілерін жаңғыртуға жұмсалмақ. Бұдан бөлек, Босфор бұғазы арқылы өтетін «Гебзе — Явуз Сұлтан Селим көпірі — Стамбул халықаралық әуежайы — Чаталджа» желісі мен Еркёй — Кайсери бағытындағы ірі жобалар да қаржыландырылады.