Ұлыбританияда алғашқы аккумуляторлы пойыз жолаушы тасымалдауды бастады
Great Western Railway операторы (FirstGroup құрамына кіретін GWR) 230-сериялы аккумуляторлы моторвагонды пойызды тұрақты пайдалануға берді. Бұл пойыз Лондонның батысындағы ұзындығы 4 шақырымдық Вест-Илинг — Гринфорд учаскесінде 22 айдан астам уақытқа созылған сынақтан сәтті өткен болатын, деп хабарлайды Rail-news.kz.
Сынақ барысында тарту аккумуляторларын түйіспелі рельстің қысқа кесінділері арқылы жылдам зарядтау жүйесі де тексерілді. 2025 жылдың тамыз айында бұл пойыз бір реттік зарядпен 320 шақырымды бағындырып, жүру қашықтығы бойынша әлемдік рекорд орнатты.
Аккумуляторлы пойызбен жолаушылар тасымалы 2026 жылдың 31 қаңтарында басталды. Алғашқы кезеңде пойыз тек сенбі күндері қатынайды, бірақ алдағы уақытта GWR оны аптаның басқа күндерінде де тұрақты рейстерге шығаруды жоспарлап отыр.