Қытайдан Тәжікстанға алғашқы контейнерлік пойыз жолға шықты
Қытайдан Тәжікстанға Қырғызстан мен Өзбекстан арқылы өтетін мультимодальды көлік дәлізі бойынша алғашқы пилоттық контейнерлік пойыз аттанды, деп хабарлайды Rail-news.kz.
Жобаны Қытай-Өзбекстан бірлескен компаниясы жүзеге асырды. Пойыз Ланьчжоу станциясынан шығып, Душанбе-2 станциясына қарай бағыт алды.
Пойыз құрамында халық тұтынатын тауарлар мен құрылыс техникасы тиелген сегіз 40 футтық контейнер бар. Маршруттың ұзындығы 3 500 шақырымнан асады. Жүкті жеткізудің транзиттік уақыты 18-20 күнді құрайды. Бұл жоба Қытай мен Орталық Азия елдері арасындағы тұрақты контейнерлік тасымалды дамытудың маңызды қадамы ретінде қарастырылуда.
Компания 2025 жылдың шілдесінде Қытай мен Өзбекстан тараптарының қатысуымен құрылған. Кәсіпорын жүктерді шоғырландыруға және өңірдегі теміржол мен мультимодальды тасымалдарды дамытуға маманданған.
Ресми мәліметтерге сәйкес, Қытай - Тәжікстанның ірі сауда серіктесі. 2025 жылы екіжақты тауар айналымы 2 млрд 850 млн долларға (шамамен 214,9 млрд ресей рублі) жетіп, өткен жылмен салыстырғанда қазіргі көрсеткіш 46%-ға жуық өскен.
«Қытай - Қырғызстан - Өзбекстан - Тәжікстан» көлік дәлізі өңірге жүк жеткізудің баламалы бағыты ретінде қалыптасып келеді. Тәжікстан мен Қытай арасындағы сауданың негізгі көлемі тұтынушылық және өнеркәсіптік тауарлар импорты мен шикізат ресурстарының экспортына тиесілі. Екі ел арасында автокөлік тасымалы жүзеге асырылғанымен, олардың көлемі таулы жолдардың жағдайына байланысты шектеулі болып отыр.