Қытайда теміржол көлігіндегі инновациялар бойынша 10-шы жастар байқауы өтті
Қытайда теміржол көлігі саласындағы технологиялар мен инновациялар бойынша 10-шы ұлттық жастар сыйлығының қорытындысы шықты. Байқаудың финалына 84 жобалық топ жолдама алды, деп хабарлайды Rail-news.kz.
Әзірлемелер саланың алдында тұрған ауқымды міндеттерді, соның ішінде жасанды интеллект негізіндегі шешімдерді, интеллектуалды жүйелер мен қозғалыс қауіпсіздігін қамтамасыз ету құрылғыларын енгізуді, сондай-ақ инфрақұрылым мен жылжымалы құрамның техникалық күйін бақылауды қамтыды.
Алтын жүлдені жоғары жылдамдықты желілердегі балластсыз жолды интеллектуалды бақылау жүйесін ұсынған теміржол көлігі жобалау-іздестіру институтының (CRFSY Tisyuan) командасы иеленді. Күміс жүлде ақпараттық модельдеу (BIM), лазерлік сканерлеу және машиналық көру технологияларын қолдана отырып, тоннельдер салуды автоматтандыру кешені үшін China Railway Tunnel Group (CRTG) компаниясының оңтүстік филиалына берілді. Бұл әзірлемені қолдану жұмыс өнімділігі мен сапасын арттыруға мүмкіндік береді.
Оқу орындарының арасында Шаньдун теміржол колледжі мен Оңтүстік-батыс Цзяотун университеті ерекше аталды. Марапаттардың көпшілігі пайдалану жұмысында жасанды интеллектіні қолдану, қауіпсіздікке төнетін қатерлерді алдын ала ескерту жүйелері, сондай-ақ теміржол инфрақұрылымын салу мен қызмет көрсетуді автоматтандыру жобалары үшін берілді.
Байқау жас мамандардың әзірлемелерін нақты процестерге интеграциялау арқылы теміржол көлігінің дамуына қалай ықпал ете алатынын көрсетті.