Польшада көпфункционалды Combo вагондары қолданысқа берілді
PKP Intercity операторының паркіне Combo типті вагондар түсе бастады. Поляк теміржолындағы H. Cegielski Rail Vehicle Factory зауытында жаңғыртудан өткен 50 көпфункционалды вагонның алғашқы алтауы қолданысқа берілді, деп хабарлайды Rail-news.kz.
Бұл жаңартылған вагондар қозғалысы шектеулі жандарға, қарттар мен балалы отбасыларға барынша ыңғайлы етіп жасалған. Өндіруші зауыт өкілдері атап өткендей, вагондар кезең-кезеңімен, соның ішінде пасха мерекелері кезінде пайдалануға берілмек.
Биыл PKP Intercity шамамен 96 миллион жолаушы тасымалдауды жоспарлап отыр. Жолаушылар ағыны үздіксіз артып келе жатқандықтан, Combo вагондарын іске қосу оператор паркін кеңейту стратегиясының маңызды бөлігіне айналды. Сондай-ақ бұл мерекелер мен жазғы маусым сияқты жолаушылар көп болатын кезеңдерге жылжымалы құрамды дайындау шарасының бірі болып табылады.
50 көпфункционалды вагонды Combo стандартына сәйкес жаңғырту туралы келісімшартқа 2024 жылы қол қойылған болатын. Бұл стандарт мүмкіндігі шектеулі жандар, велосипедшілер және балалы отбасылар сияқты жолаушылардың бірнеше санатына ортақ қолайлы шешімдерді ұсынады.
Жаңғыртылған вагондар бірқатар техникалық жаңартуларға ие болды:
Жаңа арбалар шуды азайтып, сапар жайлылығын арттырады.
Электр розеткалары мен USB-порттар орнатылған.
Wi-Fi желісі және жолаушыларға арналған заманауи ақпараттық жүйелер бар.
Сондай-ақ велосипед қоятын орындар мен сусын, жеңіл тағамдар сататын автоматтармен жабдықталған.
Combo стандартының басты басымдығы — жолаушылардың барлық санатына бірдей қолжетімді болуы. Вагондарда мүмкіндігі шектеулі жандар үшін арнайы купелер қарастырылған. Сондай-ақ олар пандустармен, автоматты есіктермен, табалдырықсыз едендермен және SOS батырмалары мен қауіпсіздік белдіктері сияқты қорғаныс жүйелерімен жабдықталған. Сонымен қатар, барлық бағыт көрсеткіштері Брайль шрифтімен толықтырылып, бағдарлауды жеңілдететін қанық түсті визуалды элементтер қосылған.
Бұған қоса, вагондарда балалы отбасылар үшін де қолайлы шешімдер қарастырылған. Олардың қатарында тақырыптық купелер мен бейімделген аймақтар бар. Демалыс орындары, жиналмалы үстелдер және әжетханалардағы баланы жөргектеу үстелдері де жолаушылар игілігіне берілген.
Қазіргі таңда PKP Intercity паркінде 115 Combo вагоны бар. Алдағы уақытта H. Cegielski және PKP Intercity Remtrak зауыттарынан тағы да жаңғыртылған вагондар келеді деп күтілуде. 2026 жылдың соңына қарай парктегі мұндай вагондар саны 172-ге жетеді деп жоспарлануда.
2024 жылы оператор жалпы құны 862,4 млн злот (201 млн еуро) болатын екі келісімшартқа қол қойды. Бұл құжаттар 500 вагонды, соның ішінде 50 Combo вагонын жаңғырту мен оларға қызмет көрсетуді қамтиды. Бұл бағдарлама жылжымалы құрамды жаңартудың ауқымды инвестициялық жоспарының бір бөлігі болып табылады. Жоспар аясында Еуропалық одақтың қолдауымен заманауи локомотивтер сатып алу және жүздеген вагонды жаңғырту көзделген.
Combo вагондарын жаңғырту жобасының құны 351 млн злотты (82 млн еуро) құрайды. Ол Ұлттық қалпына келтіру және тұрақтылық жоспары (KPO) арқылы еуропалық қорлардан бірлесіп қаржыландырылады.
Сонымен қатар, PKP Intercity компаниясы PNRR қолдауымен инвестициялық бағдарламаны жүзеге асыруда. Компания атап өткендей, бұл бағдарлама 56 заманауи локомотив сатып алуды және 248 жолаушылар вагонын жаңғыртуды қамтиды. Оның ішінде H. Cegielski Rail Vehicle Factory зауытында дайындалған 50 Combo стандартындағы вагон бар. Қазіргі уақытта оператор төлем жасауға бес өтінім беріп, олар мақұлданды. PKP Intercity шотына 1,81 млрд злоттан (422 млн еуро) астам қаражат түсті. Бұл бөлінген қаржының шамамен 84%-ын құрайды.