Alstom компаниясы NJ Transit үшін алғашқы Multilevel III екі қабатты моторлы вагонын жеткізді
Alstom компаниясы Нью-Джерси штатында, сондай-ақ Нью-Йорк және Филадельфия қалалары арасында қала маңындағы жолаушылар тасымалын жүзеге асыратын NJ Transit операторына алғашқы Multilevel III моторлы вагонын жеткізді, деп хабарлайды Rail-news.kz.
2018 жылғы желтоқсаннан бастап NJ Transit пен Alstom арасында Multilevel III сериялы моторлы және моторсыз екі қабатты вагондарды жеткізу бойынша бірнеше келісімшарт жасалды. 2025 жылғы қыркүйекте оператор Alstom-ға тағы 200 осындай вагон мен 12 дана ALP-45 гибридті локомотивіне тапсырыс берді. Нәтижесінде жеткізілетін вагондардың жалпы саны 374 бірлікке жетті, оның ішінде:
- 112 моторлы вагон;
- 100 машинист кабинасы бар моторсыз шеткі вагон;
- 162 моторсыз аралық вагон.
Бұл вагондардың басты ерекшелігі — олардан электропоездарды да, локомотив арқылы жүретін поездарды да құрастыруға болады. Сонымен қатар, жолаушылар ағынына байланысты құрамдағы вагондар санын өзгерту мүмкіндігі қарастырылған.
Бір моторлы вагон 100-ден астам жолаушыға арналған. Оның конструкциясын Alstom компаниясы NJ Transit мамандарымен бірлесе отырып әзірледі.
Жаңа екі қабатты вагондар 40 жылдан астам пайдаланылып келген ескі бір қабатты вагондардың орнын басады. Олардың сыйымдылығы жоғары және жайлылық деңгейі заманауи талаптарға сай: мобильді құрылғыларды қуаттауға арналған USB-порттармен, ақпараттық дисплейлермен және дыбыстық хабарлау жүйелерімен жабдықталған.
Жаңа вагондар 180 км/сағ жылдамдықпен жүруге қауқарлы, бұл қазіргі қолданыстағы вагондардан шамамен 50 км/сағ-қа жылдамырақ.
Вагондар Alstom компаниясының Adessia платформасы негізінде жасалған және Платтсбургтегі (Нью-Йорк штаты) зауытта құрастырылуда. Айта кетерлігі, құрамдас бөлшектердің кем дегенде 70%-ы АҚШ-тың өз ішінде өндірілген.