Ташкент вагон жасау зауыты биыл Ресейге 42 жолаушы вагонын жеткізуді жоспарлап отыр
«Өзбекстан темір жолдарының» хабарлауынша, Ташкент жолаушылар вагондарын құрастыру және жасау зауыты 2025–2026 жылдарға арналған өндіріс қуатын жаңғырту бағдарламасы аясында 70 жолаушылар вагонын шығару міндеттемесін алған, деп хабарлайды Rail-news.kz.
Қазіргі таңда оның 55-і пайдалануға берілді, ал қалған 15 вагонды кәсіпорын 2026 жылдың маусым айының соңына дейін шығарып, тапсырыс берушілерге жөнелтуді көздеп отыр.
Сонымен қатар, кәсіпорын 2026 жылдың соңына дейін Ресейге 42 жаңа жолаушы вагонын жасап шығаруды және жеткізуді жоспарлағаны белгілі болды.
Айта кетейік, соңғы бір жылда Ташкент зауыты вагондардың бес моделін шығаруды жолға қойды:
- Плацкарт вагондары 61−950 моделі;
- Купе вагондары 61−951 моделі;
- Жайлылығы жоғары (люкс) вагондар 61−955 моделі;
- Мүгедектігі бар жандарға арналған арнайы вагондар 61−956 моделі;
- Вагон-мейрамханалар 61−954 моделі.
Естеріңізге сала кетейік, 2025 жылы Ташкент вагон жасау зауыты мен Ресейдің «Трансмашхолдинг» компаниясы теміржол вагондарын бірлесіп шығару жобасын іске асыруға кіріскен болатын.