Швеция жануарларды анықтайтын жасанды интеллект жүйесін сынақтан өткізіп жатыр
Швецияда теміржол бойында жануарларды анықтауға арналған жасанды интеллект (ЖИ) жүйесі ауқымды сынақтан өтуде. Бұл технологияны Alstom компаниясы мен шведтік Flox Intelligence стартабы бірлесіп тексеріп жатыр. Жүйе теміржол маңындағы жабайы жануарларды танып, оларды жолдан алыстатуға арналған, деп хабарлайды Rail-news.kz.
Railway Supply басылымының жазуынша, бұл технология жасанды интеллект негізінде жұмыс істейді. Alstom компаниясы алғашқы нәтижелер жабайы жануарлармен соқтығысу қаупін азайтуда жүйенің әлеуеті жоғары екенін мәлімдеген. Айта кету керек, Швециядағы теміржол қозғалысының іркілуіне көбіне осы жағдайлар себеп болады екен.
«Біздің далалық сынақтарымыз жасанды интеллектінің жануарларды жоғары дәлдікпен анықтай алатынын көрсетті. Жабайы табиғатты қорғау саласындағы тәжірибемізді Alstom-ның теміржол инновацияларындағы біліктілігімен ұштастыра отырып, біз жануарларды да, желінің сенімділігін де қорғайтын технология жасап жатырмыз», – дейді Flox Intelligence бас директоры Сара Нозкова.
Ал, Alstom-ның Швециядағы бас директоры Мария Сигнал Мартебоның пікірінше, бұл жоба Швеция теміржол көлігінің қауіпсіздігі мен тұрақтылығы үшін маңызды. Сынаққа қатысқан топтар, тіпті қысқа қашықтықтарда, әсіресе авариялар жиі болатын учаскелерде жануарлардың өте көп екеніне таңқалған.
Alstom және Flox Intelligence әзірлеген шешім ЖИ-ді қолдайтын бейнекамераларға негізделген. Жануарлар жолға жақындаған кезде, жүйе арнайы дыбыстық сигналдарды қосады. Бұл сигналдар жануарларды теміржол аймағынан үркітіп, алыстатуға бағытталған.
Сынақтың бірінші кезеңінде технология жануарлардың бірнеше түрін, соның ішінде бұландарды, киіктерді, түлкілер мен жабайы қабандарды анықтады. 2026 жылдың сәуір айындағы жағдай бойынша, жоба енгізудің жаңа фазасына өткен. Енді бейнебақылау дыбыстық ескерту жүйелерімен біріктіріледі.
Сынақтар Швецияның Далабанан және Бергслагсбанан сияқты бірнеше теміржол желілерінде өтіп жатыр. Жұмыс аймақтық теміржол органы Tåg i Bergslagen және VR операторымен бірлесіп жүргізілуде. Сонымен қатар, жоба шведтік Vinnova инновациялық агенттігінен қаржы алып отыр. Бұл қадам Еуропалық Одақ алға қойған қауіпсіздік пен тұрақтылық мақсаттарына жету жолында маңызды деп саналады.
Жасанды интеллект жүйесі тек ірі аңдарды ғана емес, сонымен қатар ұсақ жануарлар мен құстарды да анықтайды. Бұрын олар теміржол статистикасына ілінбейтін еді. Әрбір анықталған жағдай талданып, жіктеледі, бұл алгоритмдердің уақыт өте келе жетіле түсуіне көмектеседі.
Сынақ кезінде технология үй жануарлары мен құстарды (соның ішінде қарғалар мен көгершіндерді) анықтауда өте жоғары дәлдік көрсеткен. Ал бұландар мен киіктерді тану сапасын жақсарту үшін ЖИ-ді қосымша оқыту қажет.
Швецияда жыл сайын пойыздардың жануарлармен соқтығысуының 5 000-ға жуық жағдайы тіркеледі екен. Мұндай оқиғалар жабайы табиғатқа зардап тигізіп қана қоймай, пойыздардың кешігуіне, жөндеу шығындарына және машинистердің психологиялық шаршауына әкеп соғады. Жоба осындай апаттарды азайтуға, пойыздардың уақытылы жүруін жақсартуға және қоршаған ортаға тигізетін әсерді төмендетуге бағытталған.