Биыл Ресей теміржолдарында апат пен пойыздардың рельстен шығу жағдайлары көбейген
Теміржол көлігі саласындағы қадағалау жөніндегі мемлекеттік инспекция мәліметінше, қаңтар–наурыз аралығында 6 ірі жол апаты тіркелген. Былтыр осы кезеңде мұндай 3 оқиға болған. Барлық апат теміржол инфрақұрылымында орын алған, деп хабарлайды Rail-news.kz.
«РЖД партнер» басылымының жазуынша, үш ай ішінде 128 вагон мен локомотив зақымданған. Оның 93-ін қалпына келтіру тиімсіз деп танылған.
Екі ірі апат Қиыр Шығыс теміржолында тіркелген. Соның бірі Забайкалье бағытында жүк пойызының рельстен шығуына байланысты болды. Тергеу барысында локомотивтегі техникалық ақаулар мен рельске түскен шамадан тыс күш себеп болғаны анықталған. Тағы бір апат вагон дөңгелегі осінің сынуынан болған. Бұған жөндеу талаптарының сақталмауы әсер еткен.
Сонымен қатар, 2026 жылдың І тоқсанында теміржол инфрақұрылымында 65 рельстен шығу және соқтығысу оқиғасы тіркеліпті. Өткен жылы бұл көрсеткіш 51 болған. Оқиғалардың көбі Горький және Қиыр Шығыс теміржолдарында болған.
Негізгі себептер:
— маневр жұмыстары кезіндегі қателіктер;
— теміржол жолдарын дұрыс күтпеу;
— жылжымалы құрамды сапасыз жөндеу.
Теміржол өткелдеріндегі жол-көлік оқиғалары да артқан. Биыл алғашқы тоқсанда 79 ДТП тіркелсе, былтыр 62 болған. Барлық жағдайда жүргізушілер бағдаршамның тыйым салатын белгісіне қарамастан өткелге шығып кеткен.
Апат салдарынан қаза тапқандар саны 12-ден 17 адамға дейін, ал жараланғандар саны 16-дан 25 адамға дейін өскен.