Stadler мен ARST әлемдегі алғашқы тар табанды коммерциялық сутегі пойызын таныстырды
Stadler компаниясы мен Италияның Сардиния аралында аймақтық тасымалдаумен айналысатын ARST жолаушылар операторы тар табанды (950 мм) теміржол желілеріне арналған, сутегі отын элементтерімен жұмыс істейтін әлемдегі алғашқы пойызды көпшілікке таныстырды деп хабарлайды Rail-news.kz.
Тұсаукесер рәсімі Швейцарияның Эрлен коммунасындағы Stadler кәсіпорнының қабылдау цехында өтті. Бұл пойыздар 2028 жылдан бастап Сардиния желілерінде қатынай бастайды.
Қазіргі уақытта ARST операторы 10 сутегі пойызына тапсырыс беріп қойды. Stadler компаниясымен жасалған негіздемелік келісімшартқа ARST-пен бірге Калабрия аймағындағы жолаушылар тасымалына жауапты Ferrovie della Calabria (FdC) операторы да қол қойды. Сондай-ақ, 2025 жылдың күзінде Stadler Италияда Сицилия аралына осындай екі пойыз жеткізу бойынша тағы бір келісімшарт бекіткен болатын.
Сардинияда 10 сутегі пойызы іске қосылған кезде, дизельдік тартқышпен салыстырғанда атмосфераға таралатын көмірқышқыл газының жылдық көлемі 2100 тоннаға азаяды. Екі вагонды пойыздың құрамына арнайы аралық секция енгізілген. Онда отын элементтері, аккумуляторлық батареялар жинақтағыштары және тарту жабдықтары бар күштік қондырғы орналасқан. Пойызды жанармаймен қамтамасыз ететін сутегі тек күн электр станцияларынан алынатын энергия арқылы өндірілетін болады.
Италияның тар табанды теміржол желілеріндегі пайдалану талаптарына сай болу үшін пойыздың конструкциясы барынша жеңілдетілген. Кіреберіс аймағындағы еден деңгейі төмендетілген бұл вагондар кондиционер жүйелерімен және панорамалық терезелермен жабдықталған.