Австралияда Alstom компаниясының алғашқы X'Trapolis дизельді пойызы іске қосылды
Үш вагоны бар пойыз құрамы 29 маусымнан бастап Перт пен Банбери қалаларының арасындағы «Australind» желісінде жолаушыларды тасымалдай бастады. Пойыз 167 шақырымдық қашықтықты 2,5 сағатта еңсереді. Бастапқы кезеңде ол аптасына екі бағытта төрт рейс жасайтын болады, деп хабарлайды Rail-news.kz.
Теміржол қатынасы 2023 жылдың қарашасында басталған және құны 110 миллион долларды құраған желіні жаңғырту жұмыстары толық аяқталғаннан кейін ашылды. Қалған 3 пойыз құрамы алдағы бірнеше ай ішінде кезең-кезеңімен бағытқа шығады деп жоспарлануда. Негізінде бұл желіні ашу 2025 жылға жоспарланған болатын, алайда сынақ жұмыстары кезінде туындаған қиындықтарға байланысты мерзімі шегерілді.
Пойыз салоны 158 отыратын орынға және мүгедектігі бар жандардың арбаларына арналған 6 орынға есептелген. Сондай-ақ ішінде 14 велосипед сақтайтын бөлім мен буфет қарастырылған. Құны 800 миллион еуроны құрайтын бұл келісімшартқа 2019 жылы Батыс Австралия штатының Қоғамдық көлік басқармасымен (PTA) қол қойылған болатын. Шарт бойынша Alstom компаниясы 41 алты вагонды электр пойызын және 4 үш вагонды дизельді пойызды жеткізуі тиіс еді. Электр пойыздары 2024 жылдың сәуір айында пайдалануға берілген болатын.
Келісімшарт талаптарына сәйкес, пойыздардың кем дегенде 50%-ы Австралия аумағында шығарылуы керек еді. Осы мақсатта Alstom компаниясы 2021 жылы Балларат пен Данденонгтан кейінгі еліміздегі үшінші өндіріс орнын Белвью қаласындағы жылжымалы құрам шығаратын алаңды іске қосты. Осылайша, Батыс Австралия штатында бұдан 30 жыл бұрын тоқтап қалған теміржол көлігі өндірісі қайта жанданды.
