Ұлыбританияда алғашқы экологиялық таза вокзал ашылды
Ұлыбританияның Кембридж қаласында көмірқышқыл газының (CO₂) шығарындысы нөлге тең алғашқы теміржол вокзалы – Cambridge South пайдалануға берілді. Жобаға 250 млн фунт стерлингтен астам инвестиция салынған, деп хабарлайды Rail-news.kz.
Төрт платформалы жаңа вокзал Кембридждің қарқынды дамып келе жатқан биомедициналық кластеріне қызмет көрсетеді. Мамандардың болжамынша, мұнда жыл сайын шамамен 1,8 млн жолаушы қатынайды.
Вокзал құрылысында экологиялық шешімдерге басымдық берілген. Ғимаратқа жаңбыр суын тиімді басқаруға арналған жасыл шатыр орнатылып, мыңнан астам велосипед тұрағы салынды. Сондай-ақ аумаққа жергілікті ағаш түрлері отырғызылып, жабайы табиғаттың тіршілік ортасын сақтауға бағытталған инфрақұрылым жасалған.
Жобаны жүзеге асырған Arcadis компаниясы жобалау, экологиялық жоспарлау және құрылысты үйлестіру жұмыстарын атқарды. Құрылыс барысында 3D модельдеу, дрондармен түсірілім және бірыңғай цифрлық басқару жүйесі қолданылды.
Компания өкілдерінің айтуынша, Cambridge South экологиялық тұрақтылықты, биоалуантүрлілікті және заманауи көлік инфрақұрылымын үйлестіретін жаңа буын теміржол вокзалының үлгісі саналады.