Қырғызстан неліктен «Қытай - Қырғызстан - Өзбекстан» теміржол жобасының ұзын әрі қымбат бағытын таңдады?

Теміржол құрылысы бойынша сарапшы Марат Исаков радио эфирінде Ыркештам арқылы өтетін бағыттың Қырғызстан үшін Торугартқа қарағанда тиімсіз екенін хабарлады, деп хабарлайды Rail-news.kz.

«Ыркештам арқылы өтетін жол Қырғызстанды тек екі ортадағы «көпірге» айналдырар еді. Біздің аумақ арқылы өтетін жолдың ұзындығы бары-жоғы 150 шақырымдай болып, негізгі пайда басқа мемлекеттерге кетер еді», - деді ол.

Исаковтың пікірінше, Торугарт арқылы өтетін солтүстік бағыттың таңдалуына инфрақұрылым екінші орында болған. Жобада Қытайдың 1435 мм-лік теміржол стандартын пайдалану көзделген, ал Қырғызстан мен Өзбекстанда ресейлік 1520 мм-лік ендік қолданылады. Дөңгелек жұптарын ауыстыру пунктін Қырғызстандағы Макмал станциясында орналастыру жоспарланып отыр.

Қытайдан Өзбекстанға өтетін теміржол жобасы бойынша 8 түрлі бағыт нұсқасы болған. Бішкек көптеген консультациялардан кейін екі нұсқаға тоқталыпты:

Солтүстік бағыт – «Қашқар – Торугарт – Арпа – Қарасу – Әндіжан» (таңдалғаны): Жалпы ұзындығы 532 км, оның 305 км-і Қырғызстан арқылы өтеді. Жаңадан 280–305 км жүріс жолын салу қажет. Құрылыс қиындығы өте жоғары: бағыттың үштен бір бөлігін тоннельдер мен эстакадалар құрайды.

Оңтүстік бағыт – «Қашқар – Ыркештам – Сарытас – Ош – Әндіжан» (қабылданбағаны): Жалпы ұзындығы 450 км-ге дейін, оның 160–180 км-і жаңа жолдар. Құрылыс қиындығы орташа.

Еске салсақ, «Қытай – Қырғызстан – Өзбекстан» теміржолының құрылысы 2024 жылдың аяғында бастау алған болатын.

Жобаның жалпы құны шамамен $5 млрд құрайды, оның $4,7 млрд-ы қырғыз бөлігінің құрылысына бағытталады. Жобаның басым бөлігін Қытай қаржыландырады.