Еуропадағы ең үздік 10 теміржол вокзалы
Еуропадағы теміржол вокзалдарының жаңа рейтингі жарияланды. Зерттеу құрлықтағы жолаушы ағыны ең жоғары 60 станцияны қамтыған. Рейтинг қорытындысы бойынша Швейцарияның Zürich Hbf вокзалы Еуропадағы ең үздік ірі теміржол торабы атанды, деп хабарлайды Rail-news.kz.
Consumer Choice Center әзірлеген Еуропалық теміржол вокзалдары индексінде пойыздардың кешігу үлесі мен жолаушылардың орташа күту уақыты негізгі көрсеткіштердің бірі ретінде есепке алынған.
Сонымен қатар вокзалдардағы қызмет көрсету орындарының саны, мүмкіндігі шектеулі жолаушыларға жасалған жағдай, тегін Wi-Fi желісінің болуы, ұлттық және жергілікті теміржол желілеріне қолжетімділік, сондай-ақ билет түрлерінің алуандығы бағаланған.
Зерттеуде Швейцария теміржол тасымалының сенімділігі бойынша Еуропадағы жоғары стандартты сақтап отырғаны атап өтіледі. Ел бойынша пойыздардың уақытында жүру көрсеткіші 94,1 пайызды құрайды.
Жалпы рейтингте бірінші орын алған Zürich Hbf вокзалында пойыздардың небәрі 4 пайызы кешігеді. Bern Hbf бесінші орынды бөлісті. Мұнда пойыздардың кешігу көрсеткіші 1,8 пайызды құрайды.
Ал пойыздардың уақытында жөнелтілуі бойынша Luzern Hbf үздік нәтиже көрсеткен. Жалпы рейтингте 14-орында тұрған бұл вокзалда пойыздардың небәрі 0,3 пайызы кешігеді.
Германиядағы жағдай керісінше. Зерттеу авторлары елдегі теміржол көрсеткіштері алдыңғы рейтингтермен салыстырғанда нашарлай түскенін атап өткен.
Рейтингтегі ең төмен нәтиже көрсеткен 30 вокзалдың 15-і Германияда орналасқан. Неміс вокзалдары арасында ең жоғары орынға Berlin Hbf ие болды. Алайда ол жалпы тізімде небәрі 18-орында. Мұнда пойыздардың 61,1 пайызы кешігеді, ал жолаушылардың орташа күту уақыты 20 минутты құрайды.
Жалпы Еуропа бойынша пойыздардың кешігу деңгейі орта есеппен 29 пайыз болса, Германияда бұл көрсеткіш 49,4 пайызға жетеді. Құрлық бойынша жолаушылар пойызды орта есеппен 8,06 минут күтсе, Германияда күту уақыты 14,74 минутты құрайды.
2026 жылғы Еуропаның үздік ірі теміржол вокзалдары:
1. Zürich Hbf — Швейцария
2. Gare du Nord — Париж, Франция
3. Amsterdam Centraal — Нидерланд
4. Wroclaw Główny — Польша
5. Bern Hbf — Швейцария
6. Gare Montparnasse — Париж, Франция
7. Gare Saint-Lazare — Париж, Франция
8. London Bridge — Ұлыбритания
9. Kraków Główny — Польша
10. London St. Pancras International — Ұлыбритания