Теміржолшылар арасындағы футбол турнирінде «Батыс» өңірлік филиалы жеңіске жетті
«Қазақстан теміржолшысы» газетінің тілшісі
«Жолаушылар тасымалы» АҚ кәсіподақ комитеті «Қазтеміржолкәсіп» ҚБ қолдауымен барлық филиал қызметкерлері арасында футболдан турнир өткізді.
Турнирге 13 командаға бөлінген 130 адам қатысып, жүлделі орындар үшін бағы мен бабын сынады. Ұлттық тасымалдаушы компанияның кәсіподақ ұйымы төрағасы Елнара Әкімбайқызының айтуынша, бұл турнир жыл сайын дәстүрлі түрде өткізіліп, өңірлердегі аяқ доп шеберлерінің Астанада басын қосады. Ал биылғы ерекшелігі – бұл жылы турнирге жекеменшік жолаушылар тасымалдаушы компаниялардан да командалардың қатысуы. Яғни 4 команда – сол жекеменшік тасымалдаушы компаниялардың құрамасы.
Турнирдің ашылу салтанатында «Жолаушылар тасымалы» АҚ бас директорының орынбасары Сұлтан Шабидинов, «Қазтеміржолкәсіп» ҚБ Астана торабы филиалының директоры Серік Сәрсекеев сөз сөйлеп, қатысушыларға жарыс жолында сенім мен сәттілік тілеп, жігер берді.
Тартысты өткен жарыс нәтижесінде бірінші орынды компанияның «Батыс» өңірлік филиалынан құралған команда алды. Екінші орынға «Экспресс» филиалының командасы лайық деп танылды. Ал үшінші орын жекеменшік тасымалдаушы «KazRail» ЖШС командасына берілді. Әрине барлық жеңімпаз командалар, сонымен қатар көзге түскен жекелеген ойыншылар сый-сияпаттан құр қалған жоқ, лайықты марапатын алды.