Үндістан вагондарды жуу үшін дрондарды пайдалануда
Indian Railways Камакхья-Джанкшн станциясында дрондарға жоғары қысымды жуғыш құрылғы орнатып, оларды вагондар мен ғимараттарды — шатыр, депо, қасбеттерді қоса — тазалау үшін сынақтан өткізіп жатыр. Бұл тәсіл жұмысты қауіпсіз әрі үнемді етеді, деп хабарлайды Rail-news.kz.
Дрондар адамның қолы жетпейтін жерлерді тиімді тазалап, жарақат алу қаупін азайтады, пайдалану шығындарын төмендетеді және нысандарды дәл әрі сапалы жууға мүмкіндік береді екен.
Жоба Ассам штатында іске асуда және Indian Railways компаниясының цифрлық трансформация стратегиясының бір бөлігі саналады. Жаңа жүйе вокзалдар мен деполарда қызмет көрсету процесін жылдамдатып, санитарлық талаптарды қамтамасыз етуге бағытталған.
2018 жылдан бастап дрондар инфрақұрылым жағдайын бақылау үшін қолданылып келеді. 2020 жылы компания Ninja деп аталатын жетілдірілген нұсқаны таныстырып, оны нысандарды күзету мен жолдарды талдауға пайдаланған.
Компания басшылығының пікірінше, дрондар ірі станцияларда техникалық қызмет көрсетудің стандартты құралына айналады. Егер пилоттық жоба сәтті өтсе, бұл технология теміржол желісінің бүкіл аумағына таратылады.