Жыл басынан бері ҚТЖ желісінде астық тиеу 16% өсті

2022 жылғы қазаннан 2023 жылғы ақпанға дейін ҚТЖ желісі бойынша шамамен 5,3 млн тонна астық тасымалданды. Осы жылдың алғашқы екі айында астық тасымалдау көлемі 2022 жылғы қаңтар-ақпан деңгейіне қарағанда 16% өсіп, шамамен 2 млн тоннаны құрады, деп хабарлайды Rail-news.kz.

Жыл басынан бергі тасымалдардың басым бөлігін, яғни 80% (1,6 млн) экспорттық жөнелтілімдер құрады. Бұл көрсеткіш 2022 жылғы қаңтар-ақпанмен салыстырғанда 13% артық. Ұнтақ өнімдерін (оның ішінде ұнды) тиеу 31% өсіп, 600 мың тоннаға жетті. Экспортқа 450 мың тоннадан астамы тиелсе, өсім 2022 жылғы деңгейге қарағанда 55% артқан.

Отандық ауыл шаруашылығы өнімдерінің негізгі экспорты ТМД елдеріне жасалып отыр. 2023 жылдың екі айында Өзбекстанға астық экспорты 11%, Тәжікстанға – 36%, Түрікменстанға – 40%, Қырғызстанға 18% ұлғайды. Экспорт географиясы ҚХР нарықтарына жеткізу есебінен кеңеюде. Жыл басынан бері Қытайға астық экспорты 4 есе өсті. Ұнтақ өнімдерін өткізудің негізгі нарықтары ТМД, Ауғанстан және ҚХР елдері болып қала береді. 2023 жылғы қаңтар-ақпанда экспорт Тәжікстанға – 33%, Ауғанстанға – 4% және ҚХР-ға 5 есе өсті.