Абай облысынада астық тасымалы қарқын алды

Күзгі жиын-терім жұмыстары аяқталды. Осыған орай бүгінгі таңда барлық өңірде астық дақылдары, ауылшаруашылық маңыздағы жүктер тасымалы қарқын алған. Астық өнімдері негізінен контейнерлік вагондармен тасымалданатындықтан, соңғы айда жүк жөнелтудің осы түрі бойынша көрсеткіштер көлемі күрт артып отыр.

Ел шығысында да логистика саласындағы жұмыс қарбаласқа толы. Семей жүк тасымалы бөлімшесі бойынша тиелініп-түсірілетін жүктер арасында бір ғана астық тасымалының өзі көмір және түсті металдан кейінгі үшінші орынға көтерілді. Биыл аймақ көлемінде жылдық қуаттылығы 180 мың тонна астық өңдей алатын 7 лицензияланған кәсіпорын жұмыс істеуде. Яғни бұрынғы жылдарға қарағанда тапсырыс көлемі артқан. Бұл кәсіпорындарға қараша айының 1 күнгі көрсеткішке сүйенсек, 45 830 тоннаның астығы жеткізілген. Осылайша бөлімше бойынша жабық контейнерлермен тасымалданатын сусымалы өнімдерді уақыт оздырмай дер кезінде діттеген жерге жеткізу міндеті күн тақырыбына көтерілген. Сондықтан вагондар тапшылығын болдырмау мақсатындағы жұмыстар күн тәртібіне шығып отыр. Бөлімшенің барлық жүк станциялары басшыларына бірінші кезекте вагондарды ауылшаруашылық өнімдерін жеткізуге жұмылдыру, келіп түскен тапсырыстарды бір тәулік ішінде қарау тапсырылған. Ол үшін сәйкесінше тәулік бойы кезекшілік белгіленді.

Қазіргі таңда бір ғана бидай тасымалының апталық көрсеткіші бес мың тоннадан асып отыр. Оның сыртында Ауыл, Белағаш, Аягөз, Шемонайха, Жаңа-Семей және Семей сынды тораптық жүк станцияларынан тиелінетін күнбағыс пен рапс сынды майлы дақылдар тағы бар. Бұл орайда бөлімшедегі контейнерлік тасымал аптасына төрт мың тоннаны құрап отыр.  

– Қазіргі таңда станциялар бойынша жүк тиеу, түсіру мен жеткізуде кедергі жоқ. Вагондар жеткілікті. Астық тасымалында қолданыста жабық хоппер вагондар бар. Сусымалы тауарлар тасымалындағы барлық техникалық процестер жіті қадағалауда, – дейді Семей ЖТ бөлімшесінің логистика және тасымалды ұйымдастыру бөлімінің аға инженері Айтолқын Мұхамедиярова.  

Сонымен қатар бөлімше директорының логистика бойынша орынбасары Талғат Зиядановтың басшылығымен бірқатар ілкімді шаралар қабылданған. Атап айтсақ, тәуліктік вагон айналымы, тәуліктік жүк тиеу мен түсіру процесі, яғни логистика және коммерциялық жүк тасымалына қатысты жүргізіліп жатқан шаралар арнайы есепке алынып, межелі істер жиын барысында талқыланады.  

Атқарылып жатқан жұмыстар Семей ЖТ бөлімшесі бастығының міндетін атқарушы Алмас Сейсемқановтың назарында тұр.