Вагон пайдалану деполарын автоматтандыру ісінің қанатқақты жобасы сынақтан өтті
«Қазақстан теміржолшысы» газетінің тілшісі
Алматы депосында «Вагон пайдалану депосын автоматтандыру» жобасы пилоттық режимде сынақтан өтті. Бұл жобаның басты міндеті – барлық техникалық процестерді цифрландыру арқылы қағазсыз технологияға көшіру, сол арқылы вагон шаруашылығының жұмыс тиімділігін арттырып, өндірістік қауіпсіздікті қамтамасыз ету. «ҚТЖ-Жүк тасымалы» ЖШС бас директорының орынбасары Қанат Көбесов, пилоттық сынақтар «ҚТЖ» ҰК» АҚ «Цифрлық трансформация» бағдарламасы, яғни теміржол жүк тасымалын трансформациялауға бағытталған ТОП-30 бастамасын және «Үлгілі вагон депосы» жобасы бойынша Жол картасын іске асыру шеңберінде өткенін айтады. Жоба аясында вагон қараушылар сыртынан қарағанда смартфондарға ұқсайтын, арнайы мобильді терминалдар арқылы жылжымалы құрамды тексеру кезінде анықтаған ақауларды камерамен тіркейді. Бұдан әрі ақпарат жөндеуге келісім беру, ақаулық тізімдемесін бекіту үшін вагондардың меншік иесіне жіберіледі. Бұл процестердің барлығы онлайн режимінде жүзеге аспақ. Барлық тексеру деректер базасына келіп түседі және онда вагондарды жөндеу мәліметтері де сақталады. Вагон операторы web-портал арқылы ауысым мен тәуліктегі вагон депосының қызметі бойынша есеп-қисапты қалыптастырады.
«Барлық үдерістер ашық та айқын болғандықтан, оларды вагон иелері дұрыс қабылдайтын болады», – дейді Қанат Көбесов.
Оңтүстік астанада жүргізілген сынақ барысында мобильдік қосымшаға 16 пойыз, 512 вагонның тексеруден өткені туралы деректер жүктеліп, 6 ақаудың анықталғаны тіркелген және вагонның техникалық ақаулық жағдайын куәландыратын ВУ-23 алты электрондық формасы жасалған. Сондай-ақ, мобильді терминалдар арқылы сөйлесу функциясы рация қағидасы бойынша тестілеуден өткен. Қызметкерлер бұл байланыс әдісі ыңғайлы және тиімді екенін айтып отыр.
«Жаңа технологияны енгізу Алматы депосы бойынша жылына бір ғана қағаз хабарламаларды басып шығаруға кететін шамамен 15 млн теңгені үнемдеуге мүмкіндік береді, бұл тікелей және айқын шығындар ғана. Үнемге сонымен қатар вагондарды тексеру уақытын үнемдеу, ақаулардың алдын алу, жұмысқа талдау жасау және басқа да технологиялық артықшылықтар кіреді. Алдын ала жасалған деректер, жалпы барлық вагон пайдалану деполары бойынша үнемдеу жылына 220 млн теңгені құрайтынын көрсетіп отыр. Бұл көрсеткіш өсуі де мүмкін. Сондықтан болашақта вагон шаруашылығының барлық нысанын электрондық нұсқаға көшіру жоспарда бар», – дейді бас директордың орынбасары.
Қысқы ауа-райы жағдайында жобаны сынау астаналық вагон пайдалану депосында пилоттық режимде жүзеге аспақ. Бұдан кейін елдің барлық вагон деполарындағы процестер автоматтандырылады. Ұйымдастырушылар мұндай тәсіл барлық вагон операторларын Бірыңғай басқару орталығына біріктіретініне және жылжымалы құрамға қызмет көрсету сапасын жақсартатынына сенімді.