Пойыздар қозғалысы кестесін құру жоспарын автоматтандыру
Өткен аптада Маңғыстау темір жолына «ҚТЖ» ҰК» АҚ «Автоматтандыру және цифрландыру дирекциясы» филиалы директорының орынбасары Марат Садықов пен «Пойыздар қозғалысы кестесін құру жоспарын автоматтандыру» атты жұмыс тобының өкілдері жұмыс сапарымен барды.
Бөлімшенің жүк тасымалы бойынша жұмыстары және пойыздар қозғалысы кестесімен танысқан басшылар түбек теміржолшыларымен кездесу барысында бірнеше өзекті мәселелерді талқылады. Атап айтқанда, жолаушылар және жүк пойыздарының қозғалысын ұйымдастыру, пойыздарды қабылдап алу және жөнелту бойынша ішкі түйісу жұмыстары, пойыздарды құру, құрастыру бойынша сұрыптау станциялары, теңіз порттарында, жүк тиеу-түсіру станцияларында вагон айналымының пайда болуы, негізгі және айналымдық деполарда пойыздарға локомотив бекіту, жүк пойыздарының ұзындықтары мен салмағындағы өзгерістерді есепке ала отырып телімдер бойынша пойыздардың салмақ нормалары ерекшеліктері мен пойыз перегонда жүріп келе жатқанда жол профилінің ықпалы сынды тақырыптар аясында сөз болды.
– Бізді ауқымды жұмыс күтіп тұр, алдымызда үлкен міндеттер тұр. Пойыздар қозғалысын ұйымдастыру мәселелері бойынша бизнес-процестерді автоматтандыру және цифрландырумен байланысты, сонымен қатар пойыздар қозғалысының тиімді кестесін жасауға қатысты жұмыстар жоспарда бар, - деді Мақат Садықов.
Елордадан арнайы келген жұмысшы топ алдында өз ауысымдарында қызмет етіп отырған бөлімше бойынша кезекші Қуанышбек Мадиев, локомотив диспетчері Жомарт Қазмағамбетов, телімнің пойыз диспетчерлері Ерсайын Жоламан, Абзал Ізімбергенов, Манарбек Хайдаров, Руслан Ахмедов сынды маңғыстаулық теміржолшылар өз жұмыстарын жоғары деңгейде көрсетіп, жалпы аймақтағы қозғалыс ерекшеліктерімен таныстырды.