Аягөз – Бақты: техникалық негіздемесі жасалуда
Шығыс Қазақстан облысы бойынша меншікті тілші, Семей
Қазақстан темір жолының 25 жылдық мерейтойы қарсаңында тағы бір ауқымды әрі тың жоба жүзеге асырылмақ. Қазақстан мен Қытай арасындағы үшінші теміржол өткелі болады деп жобаланып отырған Аягөз – Бақты телімін салу мәселесі пісіп жетілуде.
Мемлекеттік деңгейдегі айтулы жоба – Аягөз – Бақты теміржолын салу таяу болашақта жүзеге асырылады. Бүгінде құрылыс жобасының техникалық-экономикалық негіздемесі әзірленіп жатқан көрінеді. Бұл туралы теміржолшылар қаласы Аягөз қаласында өткен халықпен кездесу жиынында Абай облысының әкімі Нұрлан Ұранхаев мәлім етті. Президент тапсырмасының жүзеге асырылуы жергілікті атқарушы биліктің назарында тұр.
Сонымен қатар, Мемлекет басшысының теміржолшыларға міндеттемесі жөнінде жуырда Семей ЖТ бөлімшесінің бастығы Владимир Бабиченко да айтып өткен болатын. Осы мақсатта бөлімше тарапынан арнайы топ құрылып, кешенді жұмыс жүргізбек. Атап айтсақ, Аягөз станциясы мен Бақты кеден бекеті арасындағы 270 шақырым аумақ арнайы мамандардың көмегімен толық зерттелмек. Алынған нәтиже мемлекеттік комиссия назарына ұсынылатын болады. Қазіргі болжам бойынша желі бойында Бақты, Мақаншы, Үржар, Таскескен сынды бірқатар жаңа станциялар пайда болуы жобаланған.
Ал, Қарамай – Тачэн – Аягөз – Бақты транзиттік теміржол бағыты Ресей федерациясы мен Монғолияны да жалғай алатын әлеуетке ие. Сондықтан да, маңыздылығы зор. Ол туралы көрші елдің «Ведомости» тәрізді іскерлік бағыттағы басылымдары да сараптамалық материалдар жариялауда.
– Қазіргі күні Семей ЖТ бөлімшесінің Ресеймен шекаралас Локоть станциясындағы жүк ағыны күрт артып отыр. Нәтижесінде жергілікті теміржолшылар үшін жүктеме де көбейген. Жылжымалы құрамдар саны ақпан айымен салыстырғанда 8-9 пойызға артқан. Бұл көрсеткіш алдағы уақытта да ұлғая бермек. Қытайға ағылған құрамдар Достық станциясының қабылдау жүктемесіне елеулі салмақ түсіруде. Бұл да Аягөз – Бақты жобасын жүзеге асыруды жылдамдата түспек, – дейді бұл орайда Семей ЖТ бөлімшесінің логистика және жүк тасымалы бөлімі мамандары.
Болжам бойынша Қытай тарапы және инвесторлар дайын отырғандықтан жаңа жоба алдағы жылы басталуы тиіс. Бұл ел шығысындағы теміржол желілерін салу бойынша үшінші әрі ең күрделі жоба болмақ.