Елордада машина жасаушылардың халықаралық көрмесі өтеді
«Қазақстан теміржолшысы» газетінің тілшісі
Биыл Қазақстан машина жасаушыларының мерейтойлық X форумы аясында «KAZAKHSTAN MACHINERY FAIR 2022» халықаралық мамандандырылған көрмесі 21-23 қыркүйек аралығында өтеді, деп хабарлайды Rail-news.kz.
«EXPO» халықаралық көрме орталығында машина жасау және металл өңдеу бойынша өткізілетін үш күндік көрмеге теміржол саласында техника өндіретін кәсіпорындар да қатысады. Форумның пленарлық отырыстары Қазақстан экономикасының дамуындағы машина жасаудың рөліне арналады. Форум өнеркәсіптік саясат туралы қабылданған Заңды ескере отырып, машина жасауды дамытудың 2019- 2024 жылдарға арналған Жол картасын іске асыру, машина жасау саласының мамандарын даярлау, «Самұрық-Қазына» қорының машина жасау өнімдерін шығаратын отандық өндірушілерді ынталандырудағы рөліне арналған секциялық отырыстардан тұрады.
Kazakhstan Machinery Fair – бұл Қазақстандағы жетекші салалық көрме және машина жасау мамандары, үкімет өкілдері және әртүрлі бизнес қауымдастықтардың кездесу орны. Көрмеде қазақстандық және халықаралық компаниялар машина жасау саласындағы жаңа жабдықтар мен технологияларды, оның ішінде, станоктарды, дәнекерлеу жабдықтарын, робототехниканы, аддитивтік технологияларды және т.б. көрсетеді.
Былтырғы форум Қазақстан тәуелсіздігінің 30 жылдығы аясында өткен болатын. Бір айта кетерлігі, қазіргі таңда теміржолдың машина жасау саласында 100-ден астам кәсіпорындар жұмыс істеп жатыр. Сол кәсіпорындардың бірқатары биылғы форумда да бой көрсететін болады.