Мың шақырым магистраль желісі жаңартылады
«Қазақстан темір жолшысы» газетінің тілшісі
Жыл сайын магистральдық желіні жаңартып-жаңғырту – жоспарлы түрде жүзеге асырылатын шара. Темір жолдың қауіпсіздігі мен сенімділігін арттыратын жөндеу жұмыстары биыл да кестеге сай жүріп жатыр. Үстіміздегі жылдың жеті айында күрделі жөндеу жұмыстары үшін 1,4 мыңға жуық технологиялық «толаскез» берілген.
«Толаскездің» ұзақтығы 8,7 мың сағаттан асады. Қазір жүк тасымалы жоғары телімдерде жөндеу жұмыстары жүргізілуде. Межеленген көлемді мейлінше орындау үшін «толаскезге» жол машиналары мен механизмдер жұмылдырылған. Мамандардың айтуынша, «толаскез» кезінде жолдар, байланыс желісі, белгі беру, орталықтандыру және блоктау құрылғыларына жөндеу жүргізілуде екен. Биыл 551 км жолды күрделі жөндеуден өткізіп, жаңа келбетке келтіру жоспарланған. Бұдан бөлек, үстіміздегі жылы шаруашылық тәсілмен 70 км жолға күшейтілген орта жөндеу жұмыстары жүргізілуде. Бүгінде бұл жұмыс көлемі кестеге сай орындалып, аяқталуға жақын.
Сонымен қатар 75 км жолда жаңа материалдармен тұтастай рельс тіреуішін, 164,470 км жолда тұтастай рельс табанын алмастыру межеленген. Ал 133,5 км жол орташа және күшейтілген орташа жөндеу түрлерінен өтпек. Жөндеу жұмыстарының басым бөлігі Қарағанды, Жамбыл магистральдық желі бөлімшелерінің телімдерінде өтуде. Осы ретте, 2022 жылға арналған жол жұмыстарының барлығы Компанияның өндірістік бағдарламасы шеңберінде атқарылып жатқанын айтар едік. Жалпы жылдың соңына дейін 1054 км магистраль желісін жаңғырту көзделіп отыр.
Осы ретте, күрделі жөндеу жолдың сенімділігін ғана емес, сыртқы әсерлерге төзімділігін, сондай-ақ, пойыздардың қозғалыс жылдамдығын арттырып, пойыздардың жұмсақ жүрісін қамтамасыз ететінін атар едік. Магистральдық желі дирекциясының мамандары жөндеу жұмыстары барысында басымдық транзиттік телімдерге беріліп отырғанын айтады. Күрделі жөндеу кезінде темірбетонды шпалдар мен ақтөбелік зауыттан шығатын Р-65 маркалы рельстер кеңінен қолданылып келеді. Сонымен қатар жол күтіміне кететін шығындарды азайту мақсатында ресурсжинақтаушы технологияларды, яғни қайта пайдалануға жарамды ескі материалдар да пайдаланылуда.