Теміржолсу мекемесі өндіріс ауқымын әртараптандыруда

Еліміздің магистральдық темір жолы бойында орналасқан шалғайдағы разъездер мен станцияларды сумен, жылумен қамтамасыз етіп отырған «Теміржолсу» АҚ мамандандырылған мекемесі өткен жылы өз қызметінде өндіріс көлемінің өсіміне қол жеткізіп, жалпы кірісті 4% арттырды.

Атап өту керек, Теміржолсу мекемесі соңғы кезде өндіріс ауқымын кеңітіп, әртараптандыруда. Жылу мен судан бөлек түрлі деңгейде құрылыс нысандарын жөндеу мен әрлеу жұмыстарын да атқаруда. Өткен жылы «ҚТЖ» ҰК» АҚ «Магистральдық желі дирекциясы» филиалы мен «ҚТЖ-Жүк тасымалы» ЖШС-не қарасты теміржол кәсіпорындарының ғимараттары мен жасанды құрылыстарына жөндеу жұмыстарын жүргізді. Мәселен, Достық станциясында су және жылумен жабдықтау саласында тұрақты қызмет көрсету үшін 1970-1990 жылдар аралығында салынып, апатты жағдайда тұрған ұзындығы 10,8 шақырымды құрайтын жылу және су құбыры желілерін ауыстыру бойынша күрделі жөндеу жүргізілді. Ауқымды жұмыстардың жүзеге асырылуы нәтижесінде кварталішілік жылу желілерінің жалпы жағдайын айтарлықтай жақсартып, 78 үйге жылудың тасымалын қамтамасыз етті. Биылғы маусымда жылу жүйелері ақаусыз жұмыс істеп тұр.  

Сонымен қатар 111 вокзалда жылу жүйелеріне ревизия жүргізіліп, оларды шаю және қысыммен тексеру жұмыстары атқарылды. Ал 21 вокзалда жалпы ұзындығы 117,4 шақырымнан астам инженерлік желілерді ішінара ауыстыру мен жөндеу жұмыстары жүргізілді. Ағадыр станциясындағы санитарлық-гигиеналық бөлмеге жөндеу жүргізіліп, қалпына келтірілді.  

Сонымен қатар Жүк тасымалына қарасты 64 нысанда, яғни Қазақстан бойынша 300-ден астам үй-жайға (душ, асхана, жылыту бөлмелері, жуынатын бөлмелер, киім ауыстыратын бөлмелер және т.б.) ағымдық, атап айтқанда ішкі және қасбеттерді әрлеу, сантехникалық құрылғыларды, терезелерді, есіктерді, төбе жабындарын және еденді ауыстыру, сылақ және сырлау, ішкі және сыртқы инженерлік желілердің жылу жүйелерін жөндеу, қазандық құбырларын, электр құбырларын жөндеу жұмыстары жүргізілді.  

«ҚТЖ» ҰК» АҚ басшылығының шешімімен орын алған төтенше жағдайды қалпына келтіру шаралары аясында Екібастұз қаласына да көмек көрсетілді. 15 бригаданың күшімен жалпы ұзындығы 2,4 шақырым болатын қалалық тұрғын үй қорындағы 10 көпқабатты тұрғын үйде су және жылу желілері толығымен қалпына келтіріліп, «ҚТЖ-Жүк тасымалы» ЖШС мен Магистральдық желі дирекциясының балансындағы 15 нысанда жалпы ұзындығы 7,4 шақырымды құрайтын жылу желілері толық қалпына келтірілді.  

«Теміржолсу» АҚ кәсіпорын бюджетіне қосымша кірістер тарту жұмыстарын биыл да жалғастырмақ. Биыл әлеуметтік-тұрмыстық жағдайларды жақсартуды қамтамасыз ету шеңберінде Магистральдық желі дирекциясы мен «ҚТЖ-Жүк тасымалы» ЖШС-ның өндірістік және әкімшілік ғимараттарына жөндеу жұмыстарын жүргізу жоспарлануда. Сонымен қатар 143 қазандық пен 111 вокзалдың жылу жүйесіне техникалық қызмет көрсетуге калькуляция жасау жұмыстары жүргізілуде екен.