Биыл мың шақырым жол сауықтырылады

«Қазақстан темір жолы» ұлттық компаниясы инфрақұрылымды жөндеу жұмыстарының көлемін арттыруға басымдық беріп отыр. Айталық, биыл 1,1 мың шақырымнан астам жолды сауықтыру жоспарға енгізілген.

Қазіргі таңда ауқымды жұмыстар Атырау, Ақтөбе, Қызылорда, Қостанай, Павлодар, Семей және Алматы өңірлерінде жүріп жатыр. Мәселен, Астана маңындағы Аршалы – Бабатай телімінде рельс тіректерін тұтастай алмастыру, бағыттағыш бұрмаларды ауыстыру шаруалары атқарылуда. Ал кешенді жөндеу жұмыстары Мойынты – Қарағанды – Астана телімінде өткізілуде. Бұл жерде жөндеудің тереңдетілген түрі, яғни ластанып кеткен балласты тереңнен тазарту, ескі темірбетонды шпалдарды ауыстыру, рельс иіндерінің тұтастығын қалпына келтіру сынды тағысын тағы жұмыстар жүргізілуде екен.  

– Биыл біз бір мыңнан астам шақырымды сауықтырып, 108 мың шпалды темірбетонды негізге ауыстыруды жоспарлап отырмыз. Сондай-ақ алты жүзден астам бағыттағыш бұрманы алмастырмақпыз, – дейді Ербол Сәулебеков.  

Күрделі және күшейтілген орташа жөндеу жұмыстары оңтүстік өңірлерде көктемнің алғашқы айында-ақ басталады. Биылғы жұмыс Жамбыл магистральдық желі бөлімшесінде мәресіне жетіп те үлгерген.  

Жазғы жоспарлы жол жөндеу жұмыстары пойыздар жылдамдығын уақытша шектеуге мәжбүр етуде, ал бұл өз кезегінде жолаушы және жүк пойыздарының қозғалыс кестесінің сақталуына кері әсер етуде. Ұлттық компания мамандары алдағы уақытта пойыздар кідірісі Астана – Алматы, Алматы – Петропавловск, Шымкент – Астана, Жезқазған – Алматы және Алматы – Орал бағыттарында болуы ықтимал екенін жеткізді.  

Осыған орай Компания жолаушылардан қолайсыздықтар үшін кешірім сұрап, туындап отырған жағдайға түсіністік танытуларын сұрайды. Сондай-ақ «ҚТЖ» ҰК» АҚ жаппай жөндеу жұмыстары жүріп жатқан осындай күрделі жағдайда жолаушы пойыздарының нормативті қозғалыс кестесін сақтауға барлық тиісті шаралар қабылданып жатқанын хабарлайды. Жолаушылар пойыздарының қозғалыс кестесі бойынша анықтамалық ақпаратты 1433 тегін номері және «KTZN_PP_BOT» Телеграмм бот арқылы алуға болады.