Екі вокзалдың перроны жөнделеді
Атырау облысы бойынша меншікті тілші
Тоғыз жолдың торабы Мақат станциясы мен қазақ мұнайының қара шаңырағы саналатын Доссор кентіндегі теміржол вокзалдарында перронды күрделі жөндеу мен қайта салу жүргізілмек.
Отыз мың халқы бар осы екі кентке биыл перрон салуға бюджеттен қаражат бөлініп отыр екен. Бұл туралы Мақат аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Темірбек Іңірбай мәлімдеді. Мақат кентіндегі вокзал перронын күрделі жөндеу үшін жоба құны 319 млн 382 мың теңге болып бекітілген. Шарт бойынша жобалаушы мекеме – «Сала» ЖШС, мердігер «Дос7» ЖШС. Перрон ұзындығы 448,8 метр, ені 4 метр. Перрон аумағында 20,5х6 метр болатын әкімшілік ғимарат салу жоспарланған. Бұл ғимаратта желілік бөлім, дәмхана, демалыс бөлмесі, әжетхана және жүк қоймасы қарастырылған. Сонымен қатар жобада Led шамдары бар 37 дана көше жарығы және жолаушылар ыңғайлығы үшін 10 отырғыш, 10 дана қоқыс жәшігі қойылмақ. Қазіргі уақытта әкімшілік ғимаратқа инженерлік-инфрақұрылым жүйелерін тарту жұмыстары жүргізілді. Ол жұмыстарды биыл аяқтау көзделуде.
Ал Доссор кентіндегі вокзал перроны бойынша жоба құны 127 млн 434 мың теңге. Перрон ұзындығы 300 метр, ал ені 4 метр. Жобада Led шамдары бар 23 дана көше жарығы және 6 отырғыш, 6 дана қоқыс жәшігі қарастырылған. Доссор вокзалына перрон салу жөніндегі халық сұранысы көптен айтылып келеді, бірақ осы кезге дейін шешімін таппай келді. Пойыздан түскенде жерге биіктен секіріп түсуге мәжбүр болып, үлкен кісілер мен балаларға қиындық туғызып келген. Сондықтан перрон салу – кезек күттірмейтін шаруа.