Өткелдер қауіпсіздігі маңызды

Маңғыстау жол дистанциясына қарасты теміржол өткелдерінің бірі жақында күрделі жөндеуден өткізілді. Жөндеу жұмыстарына байланысты өткелде көлік қозғалысы уақытша тоқтатылып, жол жабылды. Екі тәулікке жалғасқан жұмыс дистанцияның өз күшімен жүргізіліп, отызға жуық жолшы тартылды.  

Күрделі жөндеу Маңғыстау – Өзен учаскесінде Маңғыстау – Р бекеті аралығы екінші шақырымдағы күзетпелі өткелде өтті.  Теміржолмен қиылысатын автокөлік жолындағы қозғалысқа таңғы сағат 9-дан келесі күнгі кешкі сағат 17:00-ге дейін шектеу қойылып,  жолшылар еш кедергісіз жұмыс істеді. Теміржолға қойылған настил ауыстырылып, ескі шпалдардың орнына темірбетонды жаңа шпалдар салынды. Жұмыс жүріп жатқан кезде жолдың қос тарапына хабарлама мен белгілер ілініп, арнайы мамандар жүргізушілерді ескертіп тұрды.  

– Бұл – біздің дистанцияға қарасты 34 өткелдің бірі. Онда жоспарлы  күрделі жөндеудің жүруіне байланысты Мұнайлы ауданының полиция бөліміне, әкімдігіне тұрғындар мен мекемелерді хабарландыру туралы хаттар жолданды. Арнайы белгілер қойылып, әлеуметтік желілер арқылы да хабарландыру жарияланды. Жол уақытша жабылып, барлық көліктерге Тамақ – Маңғыстау ст. аралығы 399-шақырымдағы күзетпелі теміржол өткелінен және Маңғыстау ст. –«Р» бекеті аралығы 5-шақырымдағы көпір астымен өтуге ұсыныс берілді. Аталған өткелдегі рельстер кеңейіп, настилі ескірген болатын. Сол себепті оған қажетті жаңартулар жүргізілді. ЖБ шпалдар төселіп, барлық жұмыс талапқа сай сапалы жасалуы қадағаланды, – дейді Маңғыстау жол дистанциясының жетекші жол инженері Мұхтар Кульчанбаев.

 Оның айтуынша, өткелдердегі пойыздардың қозғалыс қауіпсіздігін қамтамасыз ету және түрлі жол-көлік оқиғаларының алдын алу бағытында атқарылып жатқан шаралар аз емес. Мәселен өткен айда   жергілікті әкімдік, жол полициясы қызметкерлерімен бірлесіп Жаңаөзен, Қарақия, Мұнайлы, Маңғыстау аудандарында автокөлік иелерімен профилактикалық жұмыс жүргізілген. Жалпы мұндай шаралар ай сайын өтетін көрінеді. ШЧ, ЭЧ мекемелерінің қызметкерлерімен бірлесе өткелдерді тексеру жұмыстары да жиі жүргізіледі. Жылына бір рет облыстық ішкі істер департаментімен бірлескен рейд өтеді. Сондай іс-шаралардың нәтижесі болса керек,  биыл Маңғыстау жол дистанциясына қарасты өткелдерде бірде-бір жол-көлік оқиғасы тіркелмеген.

Дегенмен, жолшылар қауіпсіздіктің сақталуын қамтамасыз ететін  шараларды тоқтатпай, керісінше күшейте түсуде. Қазір олар тиісті өткелдерге бір жолақты, көп жолақты, т.т. белгілер мен шлагбаум орнату бойынша бас қатыруда. Сонымен қатар ҚТЖ-ның Бас қауіпсіздік ревизоры Шакеновтің өткелдердегі қауіпсіздікті күшейту жөніндегі тапсырмасын басшылыққа ала отырып, бейнебақылау құрылғысын орнатуды жоспарлап отыр.