Жаңа порт құрылысы басталмақ
«Қазақстан теміржолшысы» газетінің тілшісі
Маңғыстау облысында көлік инфрақұрылымы жүйелі түрде дамып келеді. Алдағы уақытта көлік қуаттары жаңа нысандармен толығады деп күтілуде. Олардың қатарында жаңа теңіз портын және теңіз жолаушылар вокзалын салу жоспары бар.
Маңғыстау облысының жолаушылар көлігі және автомобиль жолдары басқармасы алға тартқан деректерге сүйенсек, 2026 жылы жаңа теңіз портының құрылысы басталып, ол осы өңірдің Қарақия ауданында салынбақ. Қазіргі уақытта жер телімін рәсімдеу және қажетті инфрақұрылымды дайындау мәселелері тиісті мемлекеттік органдармен келісу сатысында екен. Жаңа теңіз портын салу Қазақстан порттарының өткізу қабілетін арттырып, «Қытай – Қазақстан – Ақтау – Баку – Поти – Еуропа» көлік дәлізіндегі еліміздің рөлін нығайта түспек. Сонымен қатар жүк жеткізу мерзімін 7-15 күнге қысқартып, көлік шығындарын 18-25%-ға төмендетеді деп күтілуде.
Жобаны жүзеге асыруға Қытай және Моңғолия елдерінен инвесторлар тартылуда. Инвестициялардың жалпы көлемі 300 млн АҚШ долларын құрамақ.
Бұл жоба Ақтау немесе Құрық порттарының қолданыстағы қуаттарын кеңейтуге емес, толықтай жаңа теңіз портын салуға бағытталып отырған көрінеді. Жобалық параметрлерге сәйкес оның жылдық өткізу қабілеті шамамен 20 млн тонна жүк көлемін құрап, қуаттылығы жоспарға сәйкес Ақтау халықаралық теңіз портынан екі есеге дейін жоғары болады деп межеленген. Осылайша жобалар толық іске асқан жағдайда, 2030 жылға қарай Қазақстанның теңіз порттарының жылдық өткізу қабілеті 22,3 млн тоннадан 60 млн тоннаға дейін арта түспек.
Құрылыс барысында және портты пайдалану кезінде барлығы 2 000-нан астам жаңа жұмыс орнын құру жоспарланған. Жоба аясында портқа темір жол немесе автожол тарту, терминалдар салу сияқты ілеспе инфрақұрылымды дамыту қарастырылған. Теңіз портын Қазақстанның магистральдық теміржол желісіне қосу, автоматтандырылған контейнерлік терминал құру, сондай-ақ жүк көтергіштігі 3 500 тонна болатын төрт контейнер тасымалдаушы кеме және дедвейті 5 000 тонна болатын екі паром жеткізу көзделген.
Ал теңіз жолаушылар вокзалын салу жобасына келсек, ол қолданыстағы Құрық портының базасында қазіргі жолаушыларды қабылдау пунктінің ғимаратын пайдалана отырып жүзеге асырылмақ.