Мақсат – вагон паркін ұлғайту
Осы жылдың 1 қарашасындағы есеп бойынша «Қазтеміртранс» АҚ-ның вагондар паркінде 53919 вагон бар. Оның жұмысқа «жегілгені» – 49516 вагон.
Сала басшыларының айтуынша, былтырға қарағанда биыл қоғамның вагондар паркі 81 вагонға қысқарған, бірақ эксплуатациялық парк 844 вагонға көбейген. Биыл он айда вагондардың 16369-на түрлі жөндеу жүргізілген. Кәсіпорында вагон паркін күтіп ұстау шығындарын азайту бағытында және вагон паркін ұлғайту мақсатында бірқатар шаралар қабылданып, жұмыстар жүргізілуде. Есепті мерзім ішінде вагон паркінің сақталымына қатысты 86 бұзушылық тіркелген. Мамандар сөзіне қарағанда, доңғалақ жұптарының жетіспеушілігі мәселесі бар екен. Осыған орай, МД кеңістігі бойынша Ресейден 1268 жұп доңғалақ сатып алынған. Сондай-ақ, бақылау агенттерімен доңғалақ жұптарын күрделі жөндеуден өткізу жөніндегі қосымша келісімшарттар жасалыпты. Жалпы жыл басынан бері 136 жұп доңғалақ күрделі жөндеуден өткен.
Паркті ұлғайту бойынша басқа жұмыстарды атап айтар болсақ, осы жылы вагондарды жөндеудің өндірістік бағдарламасын 100 пайыз орындау, жалдап алушыларға вагон паркінің сақталуына қатысты талаптарды күшейту көзделіп отыр. Сонымен бірге тораптардың айналым қоры мен вагон бөлшектерін жарамдылық мерзімін созуға келмейтін вагондарды бөлшектеу есебімен көбейту көзделіп отыр. Бұдан бөлек, ресейлік бақылау агенттерімен Ресей аумағындағы ҚТТ вагондары бойынша тұрақты жұмыстар жүргізу, Ресей аумағындағы жұп доңғалақтарға күрделі жөндеу жүргізуді арттыру, өндіріске отандық тауар өндірушілер өнімдерін әкелу үшін 12-9920, 12-9941 үлгісіндегі ашық вагондарға арналған тораптар мен бөлшектер атауының тізімін ұлғайту алдағы күн еншісіндегі шаруалар легінен болып отыр.
Ұлан ОРАЗ