Күрделі жөндеу: бір шақырымнан астам жол салынды

Биылғы жылы оңтүстікте ерте көктемде басталған күрделі жөндеу күн жылына басқа да аймақтарда жалғасып, күзге дейін Қазақстан темір жолының 428 шақырым темір табанды жолы күрделі жөндеуден өтер болса, 151 шақырым орташа жөндеу, 130 шақырым жол күшейтілген орта жөндеуден өткізіліп, жаңартылып-жаңғыртылмақ. 

Қызылорда жүк тасымалына қарасты жол телімдерінде жолды сауықтыру жұмыстары наурыз айынан бері жүргізіліп келеді. Өткен аптада ЖТ бөлімшесінің Аралқұм-Шөміш-Қамыстыбас станциялары аралығындағы 28,3 шақырымдық тақ жолдың күрделі жөндеу жұмыстарының 36 сағатқа белгіленген соңғы толаскезінде 1030 метр жол са лынды. Отандық Р-65 маркалы рельстер салынған күрделі жөндеу жұмыстары Қамыстыбас станциясында жасалынды. Күрделі жөндеу жұмыстары Белкөл ПМС-інің директоры Айдарбек Әбілдаевтың басшылығымен жүргізілді. Жөндеу жұмыстарын Қазалы жол дистанциясының бас инженері Сәбит Денеев, дистанцияның 1-участогының жетекшісі Кеулімжай Жақапов және станциядағы өзге де теміржол мекемелерінің теміржолшылары жөндеу жұмыстарының сапалы өткізілуіне өз үлестерін қосты.

– Бүгінгі толаскезде 50 шақты жол монтері, механизаторлар, басшылар, жалпы жүзден астам теміржолшы мен техника, бекеттегі ПЧ, ЭЧ, ШЧ секілді өзге мекемелердің еңбеккерлері жолдың техникалық талапқа сай салынуына жұмыс жасауда. Екі УК-25-9/18 кранымен рельс пакеттерін алу және жаңасын төсеу жүргізілсе, 2 грейдер жолды тегістеп, SD22 және Ч2К маркалы ауыр және өзге көлемдегі 6 дана трактор жол төсемін сүру-төсеу жұмыстарына, ВПО, ШОМ және РМ секілді арнайы жол машиналары да жұмылдырылған, – деп атап өтті Белкөл ПМС-інің директоры Айдарбек Әбілдаев.

Толаскез станциялық жолдарда жүргізіліп жатқандықтан жол төсемдері арнайы жол машиналарының көмегімен төселіп, тазаланып, техникалық талапқа сай жасалады. Күрделі жөндеу жұмыстары кезінде бекеттен кесте бойынша өткізілетін пойыздардың қозғалысына кедергі келтірген жоқ.

Жалпы, Қызылорда магистральдық желі бөлімшесі бойынша биылға жоспарланған Аралқұм-Шөміш-Қамыстыбас станциялары аралығындағы 28,3 шақырымға жоспарланған күрделі жөндеу жұмыстары аяқталуға жақын. Одан кейінгі кезекте арнайы жол техникаларының көмегімен жазғы жол жұмыстары – тегістеу, түзету, бекіту, нығыздау, ажарлау, рельстерді дәнекерлеу сынды жұмыстар жүргізілмек.