Шығынды азайтқан шаралар
«Қазақстан теміржолшысы» газетінің тілшісі
Биылғы жылдың тоғыз айы мәресіне жетіп, ел өңірлеріндегі жүк тасымалын ұйымдастырушы бөлімшелер үш тоқсанда атқарған жұмыстарының қорытындысын шығаруда. Солардың қатарындағы Ақмола жүк тасымалы бөлімшесі есепті мерзімде негізгі 16 пайдалану көрсеткішінің 15-ін толық орындап шығып, тоғыз айда таза табысқа жетіп отыр.
Осы ретте, негізгі қорды құрушы көрсеткіш – жүк айналымының 100,6% орындалып, өткен жылдың сәйкес мерзіміне қарағанда көрсеткіш жақсарып, 104,7%-ке шығып отырған екен. Бөлімше бойынша жүк тиелімі жоспары да межесінен асып түсіп 100,5%-ті құраса, статистикалық жүктеме мен локомотив жүрісі 101 және 102,3%-терге, локомотивтің өнімділігі 102,3, техникалық жылдамдық 100,7, телімдік жылдамдық 100,8, сондай-ақ, 1-жүк операциясы кезіндегі вагонның тұруы 101,3, жергілікті вагонның айналымы 102,7%-терге жетіп жығылған. Тек қана бір көрсеткіш, динамикалық жүктеменің орындалуы 99,9% құраған.
Ақмола жүк тасымалы бөлімшесінің шұғыл-тарату бөлімінің бастығы Расул Боратаев ұсынған мәліметке сүйенсек, Ерей ментау – Бурабай курорты – Ерейментау, Ерейментау – Атбасар – Ерейментау полигонында локомотив бригадаларының қызмет көрсету иіндерін ұзартып және локомотив айналымына «сквозной» – яғни толассыз өткізу принципін енгізу, сайып келгенде, Нұр-Сұлтан станциясында пойыздардың кідірісін болдырмай, локомотив жүрісін, локомотив өнімділігін жақсартуға мүмкіндік берген.
Локомотив паркін пайдалану көрсеткіштерінің жай ғана орындалып қоймай, өткен жылдың сәйкес мерзіміне қарағанда әлдеқайда жақсара түскенін Ақмола жүк тасымалы бөлімшесінің локомотив шаруашылығы бөлімінің бастығы Мұхтар Балғоженов та растап отыр. «Компания басшылығының локомотив паркін ұтымды пайдалану және отын-энергетикалық ресурстарды үнемдеуге қол жеткізу туралы талабы, «тарта жесең тай қалады» деген халық даналығымен ұштасып жатыр.
Әрине, мұны жүк тасымалы бөлімшесінің ұжымы бірауыздан қолдап, осы бағытта аянбай жұмыс істеді. Нәтижесі де жемісті. 9 айдың қорытындысына сүйенсек, 86 тонна шамасында дизель отынын үнемдеуге қол жеткізіппіз. Ұжым алдында тағы бір маңызды міндет тұрды, ол дизельді отынның үлестік шығынын төмендету еді. Енді қараңыз, біз 9 айда жоспарлы 37,36 кг/өлшеуіштегі дизельді отынның үлес шығынын 37,01 кг/өлшеуішке дейін төмендете білдік. Біле білген адамға бұл – шын мәнінде, өте күрделі жұмыс. Біз бұл жетістікке локомотив паркін пайдалануды жақсарту есебінен қол жеткіздік. Осы арада бұл мәселеге қатысты мынадай факторлар: атап айтқанда, айналым пункттерінде локомотивтердің тұруын төмендету, аралық станцияларда пойыздардың кідіруін төмендету, пойыздың орта салмағын көтеру, жүк пойыздарының құрамдылығын қамтамасыз ету сынды тағысын тағы мәселелер Ақмола жүк тасымалы бөлімшесі директорының міндетін атқарушы Айнабек Жукашевтің тікелей бақылауында болып, тәулік сайын қарастырылып отырды. Сондайақ, маневрлік және магистральдық тепловоздарды тек жұмыс көлеміне қарай пайдаландық. Осындай іс-шаралардың арқасында бөлімше ұжымы тәп-тәуір табысқа қол жеткізіп отыр», – деп ой бөлісті Мұхтар Балғоженов.
«ҚТЖ» ұлттық компаниясының кірісін көбейтуге үлес қосу мақсатында Ақмола ЖТ бөлімшесінде іс-шаралар әзірленіп, онда өндірістік емес шығыстарды қысқартуға және қаржылық шығындарды азайтуға басымдық беріліпті. Мысалы, локомотивтердің тежегіш табандықтарын сынақтан өткізетін стендтің қолданысқа берілгенін айтар едік. Бұл өз кезегінде машинистер кранын сол жерде, яғни Көкшетаудың өзінде сынақтан өткізуге мүмкіндік беріп отыр, сондықтан бұдан былай Ерейментау станциясында орналасқан жөндеу депосына ат сабылтудың қажеті болмай қалды. Ендігі кезекте жылдамдық өлшеуіштерді тексеру бойынша стендті іске қосу мәселесі тұр. Ертеректе жылдамдық өлшеуіштерді Құсмұрын станциясына апарып, ондағы жекеменшік жөндеу кәсіпорнының табалдырығын тоздыруға тура келетін. Бұл мәселе де көп кешікпей шешімін таппақ.
Мұхтар Балғоженов жөндеу цехындағы тағы бір жетістікке доңғалақ жұптарын қайрап, жұмырлайтын станоктың іске қосылғанын атап өтті. Жұмырдай ғана станок локомотивтерді Астана жөндеу депосына және Жаңаесіл станциясында орналасқан Феникс кәсіпорнына жөнелту проблемасына нүкте қойып берген. Сондайақ, мұның Компания шығынын едәуір қысқарта түсетінін есептей беріңіз. Ақмола жүк тасымалы бөлімшесінің мамандары осылай, елге де, өздеріне де шарапатын тигізіп отырған жобалардың тұсауын кескен. Енді төртінші тоқсанға межеленген шара – реостатты іске қосу. Және де бұл жұмыстардың бәрі жөндеу цехының позициясын едәуір нығайта түсері анық.
Бүгінде аймақта жөндеу кәсіпорнының жоқтығын ескере отырып, Ақмола ЖТ бөлімшесінің басшылығына «Altyntau Kokshetau» АҚ басшылығы локомотивтерге техникалық қызмет көрсету бойынша қызметтерін ұсынған ұсыныспен шығыпты. Қыркүйек айында олар бірінші рет маневрлік тепловозды жөндеп беріп, осындай жұмыстарды әрмен қарай жалғастыру үшін жыл соңына дейін шарт жасасқан екен. Қысқасы, Ақмола бөлімшесі қаржылық тұрақтылықты жақсартудың өзге де тиімді жолдарын қарастырып, игілікті істерін жалғастыруға дайын. Бүгінде торап қызметкерлері «ҚТЖ-Жүк тасымалы» АҚ басшылығы қол қойған Көкшетау станциясына УЗОТ құрылғысын орнату туралы шешімін орындау үшін шаралар қабылдауға жұмыла кіріскен. Бұл пайдалану шығындарын қысқартуға және Көкшетау станциясының өткізу қабілетін жақсартуға ықпал ететін күшті серпін болмақ.
«Астық және астық өнімдері сынды массалық жүк тиелген вагондарды жеделдетуді қамтамасыз ету үшін ағымдағы жылдың қыркүйек айынан бастап Ақмола ЖТ бөлімшесінің станцияларынан астық маршруттарын қалыптастыру бойынша жұмыстар жүргізілуде. Бұл тікелей пойыздарды қалыптастыру кезінде вагондардың жиналуына кететін уақыт шығынын болдырмауға мүмкіндік береді, жүктерді жеткізу мерзімін едәуір жеделдетіп, сондайақ, бірқатар жол-жөнекей сұрыптау стан- цияларында вагондарды қайта өңдеуді жою арқылы құралдарды сақтауға көмектеседі», – деп сөз түйіндеді Ақмола жүк тасымалы бөлімшесінің шұғыл-тарату бөлімінің бастығы Расул Боратаев.