Алтынкөл станциясымен танысты
«Қазақстан теміржолшысы» газетінің тілшісі
Алматы облысындағы Қазақстан-Қытай шекарасында орналасқан Алтынкөл станциясында Қаржы вице-министрі Руслан Енсебаев жұмыс сапарымен болды.
Алтынкөл станциясының басшысы қонаққа бекеттің заманауи инфрақұрылымы, жүк және контейнерлік пойыздарды қабылдаужөнелту бойынша технологиялық процесі туралы әңгімелеп берді.
Вице-министрге қайта тиеу, соның ішінде ауыр салмақты және габаритті емес, ақтарылма және сусымалы жүктерге арналған терминалдар көрсетілді. Жетіген мемлекеттік шекара теліміндегі 293-шақырымда орналасқан Алтынкөл станциясы кластан тыс жүк станциясы болып табылады.
Мұнда қазіргі заманға сай инфрақұрылым салынып және вагондарды шапшаң қарап шығу үшін озық технологиялар енгізілген.
Станция пойыздар мен вагондарды бақылаудың автоматтандырылған жүйесімен, "Инспекциялық тексерме кешенімен" және "Янтарь" жүйелерімен жарақтандырылған.
Бұл жүйелер кедендік қызметтердің өкілдерімен жүктерге бақылауды және радиацияның ұйғарынды деңгейінің болуын шұғыл тексеруге мүмкіндік береді.
Алтынкөл станциясы – "Қорғас – Шығыс қақпасы" арнайы экономикалық аймақты құру жобасымен технологиялық байланыстағы стратегиялық нысандардың бірі.
Бұл жобаның басты мақсаттары тиімді көліктік-логистикалық және индустриалдық хабты құру, өндіріс және өткізудің жалпыәлемдік жүйесіне қазақстандық өнімдерді интеграциялауды жүзеге асыру, сондайақ, халықаралық стандарттарға сәйкес келетін инновациялық, бәсекеге қабілетті отандық өнімдерді құру болып табылады.
Станцияда кірме-қайта тиеу терминалдарының инфрақұрылымдық қуаттылығын дамыту, сондай-ақ, Еуропа және Орталық Азия елдеріне, Қазақстанға Қытайдан жол тартқан пойыздардың кідіріп қалуын болдырмау бойынша жұмыстар тұрақты жүргізіліп келеді.
Жұмыс сапары кезінде вице-министр Алматы облысының Қорғас МЦПС, Алтынкөл-жол, "Нұр жолы" терминалдық пункттері сияқты шекаралық посттарды аралап көрді. Уақытша сақтау қоймаларында жүктерді орналастыру және шоғырландыру, кедендік декларациялау мәселелеріне де айрықша назар аударылды.