Теміржол техникасын өндірушілер бас қосты

Үстіміздегі жылдың 28-29 маусымында «ҚТЖ» ҰК» АҚ мен «Теміржол техникасын өндірушілер бірлестігі» коммерциялық емес серіктестігі ұйымдастырған «Инфрақұрылым және теміржол жылжымалы құрамын өндіру және қызмет көрсету кезіндегі инновациялық технологиялар мен материалдар» атты бірлескен халықаралық конференция өтті. Қазақстанда тұңғыш рет өтіп отырған шараға еліміздің және Ресейдің теміржол техникасын пайдалану және өндіру ісімен айналысатын жетекші кәсіпорындарының өкілдері қатысты. Жиынның ашылу салтанатында сөз алған Қазақстан машина жасаушылар одағының басқарма төрағасы, ҚР Президентінің штаттан тыс кеңесшісі Мейрам Пішембаев: «Теміржол саласы – экономика үшін аса маңызды саланың бірі. Екі мемлекеттің кәсіпорындары арасындағы өзара іс-қимылды нығайту өндірілетін өнімнің экспорттық әлеуетін арттыруға және осы бағыттағы өсімді жеделдетуге мүмкіндік береді», – деп атап өтті. Сонымен қатар «ҚТЖ» ҰК» АҚ Басқарма төрағасының бірінші орынбасары Қанат Әлмағамбетов пен «ТТӨБ» КБ президенті Валентин Гапанович қатысушыларға құттықтау жолдап, бұл халықаралық конференция екі мемлекеттің өндіріс саласындағы ынтымақтастығын арттыратына сенім білдірді. – Жылжымалы теміржол құрамын өндіру және қызмет көрсету кезінде инновациялық технологияларды дамыту – бүгінгі күнде өзекті мәселенің бірі. Бүгін Қазақстан аумағында алғаш рет өтіп жатқан халықаралық конференция екі мемлекеттің теміржол техикаларына қажетті өнімдерді өндіретін кәсіпорындардың өз өнімдерін көпшілік назарына ұсынып, экспорттық көкжиегін кеңейтуге мүмкіндік береді. Мұнымен қатар тәжірибе алмасу, ой-пікір бөлісу алаңына айналып отыр. Қазір «Қазақстан темір жолы» ұлттық компаниясы заманауи инновациялық технологияларды жұмыс процесінде қолдануға, пайдалануға мүдделі. Әрине, кейбір күрделі теміржол техникаларының бөлшектерін, жабдықтарын шетелден сатып алуға мәжбүрміз. Бәлкім, осындай жиындар екі елдің отандық өнім өндірушілерінің бірінде жоғын екіншісі толықтыратын бірлескен өндіріс кәсіпорындарын ашуға ықпал етер. «Теміржол техникасын өндірушілер бірлестігі» коммерциялық емес серіктестігі құрамына «ҚТЖ» ҰК» АҚ 2014 жылы кірді. Бұл бірлестіктің тағы бір ерекшелігі, ол елімізде құрастырылып шыққан техникалардың Ресейде сертификатталуына, стандартизациядан өтуіне ықпал етеді. Сондықтан аталған серіктестікпен ынтымақтастықта болу Ұлттық компания үшін де, қазақстандық өндірушілер үшін де маңызды, – деді Қанат Есмұханұлы. Пленарлық отырыс барысында қатысушылар «ҚТЖ» ҰК» АҚ бас инженері Батыр Котыревтің теміржол машинасын жасауды дамытудағы ҚТЖ рөлі туралы баяндамасын зор қызығушылықпен тыңдады. «Қазақстан Республикасында теміржол өнімдерін оқшаулау және өндіру деңгейін арттыру аясында Компания теміржол компоненттерінің негізгі номенклатурасына қатысты импортты алмастыру мәселелері бойынша жұмыс кездесулерін өткізеді. Құрамдас бөлшектерді өндірушілермен кооперацияны күшейту арқылы барынша локализациялау міндеті қойылды. Компания материалдардың жаңа түрлерін қолдану және теміржол өнімдерін пайдалану сынақтарын жүргізу бойынша техникалық шешімдерді қарастыруда, – деп атап өтті Батыр Котырев. Конференция аясында теміржолшылар, машина жасау саласын әзірлеушілер мен өндірушілер теміржол көлігін одан әрі тиімді дамыту туралы пікір алмасты. Жылжымалы құрам мен инфрақұрылымның энергия тиімділігін арттыруға, қажетті сынақтар жүргізуге ерекше назар аударды.